Po wólbach do zwjazkoweho sejma chce so Domowina runja mjeńšinowej radźe na žadanje za zakótwjenjom prawow awtochtonych mjeńšin w zakładnym zakonju a na prawo skorženja za zwjazki kaž Domowinu koncentrować. Dale w fokusu mjez druhim dwurěčnosć při awtodróhach ze serbskimi pućnikami a reforma prawa mjena wostanjetej, zo bychu žony swoje serbske swójbne mjeno we wupokazu zapisać móhli.  Na to je so prezidij třěšneho zwjazka srjedu wječor dorozumił. Prěni raz je so nowa čłonka prezidija Marlis Młynkowa na wuradźowanju gremija wobdźěliła.

Prezidij poruča zwjazkowemu předsydstwu, noweho trenarja balokoparjow Svena Ballacka, naslědnika Horsta Krawcyka, do přihotowanskeho wuběrka za Europeadu 2022 powołać. Prěni raz so prezidij z naćiskom jednanskeho porjada zwjazkoweho předsydstwa a prezidija za wólbnu dobu 2021-2025 zaběraše. Wobaj namjetaj matej so zwjazkowemu předsydstwu předpołožić.

Wobsahowje steješe w srjedźišću posedźenja prócowanje na polu kubłanja, na rozmołwje stej so tež Katharina Jurkowa, předsydka Serbskeho šulskeho towarstwa (SŠT), a Katrin Suchec-Dźisławkowa, referentka Domowiny za kubłanje a spěchowanje dorosta, wobdźěliłoj. Zaměr je, kaž Dawid Statnik wobkrući, zo „kóždy absolwent serbskeje šule serbšćinu wobknježi.” SŠT a třěšny zwjazk chcetej we wuskej mjezsobnej kooperaciji a w dialogu z wučerjemi a zamołwitymi w Sakskej a Braniborskej praktiske konkluzije z dotalnych njedostatkow sćahnyć.

Na nastork městopředsydy Marka Hančika chce so Domowina z naprašowanjom na zwjazkowe ministerstwo nutřkowneho wobroćić. Přičina je stary problem, na kotryž je Hančik hižo před dźesać lětami hłownu zhromadźiznu skedźbnił, kotryž pak přeco hišće rozrisany njeje: W rubrice staćanstwo wupokaza ma dotal „deutsch” stać, prezidij poziciju Marka Hančika podpěruje, zo by pomjenowanje „Deutschland” wšěm staćanam Němskeje lěpje wotpowědowało. Přetož je w Němskej dale a wjac staćanow wšelakich narodnosćow, kotřiž słušeja do Němskeje, bjeztoho zo su němscy wobydlerjo.