Na swojim „hybridnym” wuradźowanju srjedu (9.2.) wječor je prezidij Domowiny stejišćo třěšneho zwjazka k programej digitalizacije Braniborskeje 2025 (#dp25) wobzamknył. Z tym sej Domowina mjez druhim „sylniše nałožowanje delnjoserbskeje rěče jako druheje hamtskeje rěče” w digitalnej komunikaciji stata a towaršnosće žada. Prěni raz je so prezidij z móžnymi namjetami za nowelu Sakskeho serbskeho zakonja zaběrał a prawniskemu wuběrkej nadawk sposrědkował, diskusiju zahajić a dale wjesć. Konstituowanje wuběrkow zwjazkoweho předsydstwa je mjeztym nimale wotzamknjene.