Wurjadnu hłownu zhromadźiznu zašły pjatk w Choćebuzu wuhódnoćiwši je prezidij Domowiny na swojim „hybridnym” wuradźowanju wutoru, 7.6., popołdnju zapodaće wobzamknjenych změnow wustawkow Drježdźanskemu zarjadniskemu sudnistwu přihotował. Po tym su móžne temy za nowelu Sakskeho serbskeho zakonja prawniskemu wuběrkej třěšneho zwjazka přepodali, z kotrymiž chcedźa so wuběrkownicy na swojim přichodnym posedźenju zaběrać, doniž prezidij naležnosć w juliju njewobjedna.

Prezidij je z wjeselom na wědomje brał, zo bu próstwa Domowiny za natwar syće za regionalnu identitu a serbsku rěč wot załožboweje rady přiwzata. Třěšny zwjazk wšěm druhim próstwustajerjam w ramiku spěchowanskeho programa załožby „Serbska rěč a kultura w strukturnej změnje" za projekty Swobodneho kraja Sakska kooperaciju poskićuje. Lětuši etat Domowiny za delegowanje a kulturnu wuměnu dotal wučerpany njeje, wot nimale 20.000 eurow je dotal 11.800 eurow wobzamknjenych.

Bernd Melcher, nawoda wotnožki Rěčneho centruma Witaj (RCW) w Choćebuzu, informowaše, zo su zaso wšě dźěłowe městna wobsadźene, z tym tam 14 ludźi za zdźerženje a wožiwjenje delnjoserbšćiny dźěła.