Prezidij poruča, klětušu rjadnu hłownu zhromadźiznu Domowiny po jutrach w Delnjej Łužicy přewjesć. Wo tym a kluču delegatow ma zwjazkowe předsydstwo (ZP) w nowembrje rozsudźić. Přichodny kongres FUEN so 29.9.-2.10. w Berlinje wotměje, Domowina deleguje šěsć wosobow, prezidij namjetuje za delegaciju nimo předsydy Dawida Statnika, městopředsydy dr. Hartmuta Leipnera a jednaćelki Judit Šołćineje čłonow zwjazkoweho předsydstwa Feliksa Ričela a Kita Elu kaž tež zastupjerja młodźinskeho towarstwa PAWK, Jakuba Wowčerja. 

Dale je so prezidij na swojim wuradźowanju wutoru, 6.9., wječor z přihotom wólbow serbskich załožbowych radźićelow ze Sakskeje za dobu 2023-2027 zaběrał. ZP ma 23.9. namołwu k zapodaću namjetow wozjewić, wólby budu na zjawnym posedźenju gremija 25.11. w Slepom. Kandidaća měli so do toho serbskej zjawnosći předstajić, měni prezidij.

Schwalił je prezidij dnjowy porjad posedźenja ZP 23.9. w Choćebuzu. Na dnjowym porjedźe budu tež rezimej dźěławosće załožboweje rady w dobje 2019-2023, wuhlad na nadawki w dobje hač do 2027 a rozprawa dotalneho zastupjerja Serbow w rozhłosowej radźe RBB, Marcusa Końcarja stać. Dalše temy: wotličenje hospodarskeho plana 2021 a pomjenowanje zastupjerjow Domowiny w Poradźowacym wuběrku za prašenja serbskeho ludu poboku zwjazkoweho ministerstwa nutřkowneho.

Pětr Brězan, referent Domowiny za hospodarske a infrastrukturelne naležnosće, je prezidijej rozkładł, w kotrej měrje je regionalny planowanski zwjazk Hornja Łužica-Delnja Šleska dotal stejišćo třěšneho zwjazka za druhe cyłotne dalepisanje regionalneho plana wobkedźbował. Domowinje bě mjez druhim wažne, wuznam serbskeje rěče a kultury jako mosćik mjez Němskej a słowjanskimaj susodnymaj krajomaj wuzběhnyć a stejnišća serbskeho žiwjenja we wšelakich kónčinach wutwarić. Hižo 2020 je Domowina rewitalizaciju serbšćiny a spěchowanje maćernorěčneho wukubłanja jako zaměraj namjetowała, tomu su woni zasadnje wotpowědowali.