Palma de Mallorca/16.10.2024

Slědźerce projekta ZARI (syć za serbsku rěč a regionalnu identitu) dr. Cordula Ratajczakowa a prof. dr. Nicole Dołowy-Rybińska so wot jutřišeho na mjezynarodnym sympoziju na uniwersiće Balearskich kupow w Palma de Mallorca (Universitat de les Illes Balears) wobdźělitej. Wjace hač sto wědomostnicow a wědomostnikow budu tam hač do soboty swoje slědźenje wo rěčnych ideologijach a nastajenjach předstajić.

Rěčne ideologije su předstawy wo rěči. Na zakładźe swojich zwjetša njewědomych předstawach rozsudźa so wjacerěčni, kotru rěč woni w kotrej situaciji a z kim nałožuja.

Slědźerce projekta ZARI přednošujetej na zakładźe 30 rěčnych interviewach, kotrež stej w Hornjej a srjedźnej Łužicy zběrałoj. W přednošku wěnujetej so normje rěčneho podrjadowanja a móžnosćemi, tutón přewinyć. Je to norma, kotraž sej “žada”, so w přitomnosći němskorěčnych serbšćinje wzdać a němsce rěčeć. Wuslědźiłoj stej slědźerce, zo tuta přeco hišće rěčnu praksu najwjace Łužičankow a Łužičanow postaji.

Sympozij organizuje skupina za sociolinguistiske slědźenje Balearow (GRESIB), podrjadowana tamnišemu Institutej katalanskich studijow.

Dalše informacije namakaće tu https://gresib.uib.cat/2023/12/11/3977/.

Kontakt

prof. dr. Nicole Dołowy-Rybinska
wědomostna sobudźěłaćerka projekta ZARI
tel. 03591 3163851
nicole.dolowy-rybinska@ispan.edu.pl

dr. Cordula Ratajczakowa
wědomostna sobudźěłaćerka projekta ZARI
tel. 03591 3163851
cordula.ratajczakowa@domowina.de