Z dwurěčnej webstronu a kanalom na Instagram/Facebook je projekt ZARI nětko tež w digitalnym swěće prezentny. Informujemy wo nowosćach w projekće a šěrimy wědu wo rewitalizaciji abo wuknjenju serbšćiny, zdobom pak chcemy žiwu syć natwarić a ludźi mjez sobu zwjazać.

Na webstronje jewja so wobšěrne informacije wo zaměrach projekta a wo planowanych zarjadowanjach, kaž tež rozprawy hižo zakónčenych aktiwitow. Nimo inowatiwnych rěčnych kursow poskićuja tež wšelake formaty, so ze serbskej rěču rozestajeć a wuknjenski material interaktiwnje wužiwać. Nimo toho wobsteji móžnosć, so na stronje přez formular za zarjadowanja přizjewić.

Zdobom zhonja zajimcy tež na Instagram a Facebook (@ZARI_domowina) wo aktiwitach sobudźěłaćerkow a sobudźěłaćerjow projekta ZARI. Hač budźe to wabjenje za planowane předewzaća, rozkładźenje pozadkow abo powšitkownje zajimawe informacije ze serbskeho swěta - wšo to chcedźa ZARIčenjo šěrić. Nimo toho chcedźa wopytowarjow přez naprašowanja a akcije zawjazać a tak dołhodobny zwisk natwarić. “Chcemy přistup k našim poskitkam zjednorić a direktny kontakt k nam poskićić“, praji projektowa managerka Diana Pawlikowa.

Sobudźěłaćerki a sobudźěłaćerjo projekta ZARI přeprošuja zajimcow, sej serbsku rěč a kulturu wotkrywać a so aktiwnje za zdźerženje regionalneje identity zasadźować.

Wopytajće našu webstronu pod www.zari-domowina.de abo sćěhujće našimaj kanalomaj.

http://instagram.com/zari_domowina

http://facebook.com/zari_domowina

Kontakt:

Diana Pawlikowa
projektowa managerka
ZARI – Syć za serbsku rěč a regionalnu identitu
mejlka: zari@domowina.de
telefon: + 49 3591 316 3850

Pozadki:

Syć ZARI, projekt Domowiny – Zwjazka Łužiskich Serbow z.t., zasadźuje so za rewitalizaciju serbskeje rěče a podpěra čestnohamtske skutkowanje kulturnych towarstwow a jednotliwcow. Wuměłske a kreatiwne tworjenje lajkow  so spěchuje a wusko z wotpowědnymi institucijemi a profesionelnymi wuměłcami zwjaza. We wuchodźe Hornjeje Łužicy a w Srjedźnej Łužicy dźěła pjeć rěčnych motiwatorow z ludźimi na městnje. Z toho ma nastać syć rěčacych, kotraž w lěće 2100 100.00 rěčacych zapřija.

Projekt ZARI je w nošerstwje Domowiny a přewjedźe so wot 2022 hač do 2038. Projekt spěchuje so w ramiku programa “Serbska rěč a kultura w strukturnej změny” za projekty w Swobodnym staće Sakska, přez Załožbu za serbski lud ze srědkow Zwjazkoweho ministerstwa za Nutřkowne a domiznu na zakładźe rozsuda Zwjazkoweho sejma.