Na lětušim nalětnim přijeću kontaktneho běrowa Swobodneho stata Sakska w Praze je so dźensa 135 wopytowarjow wobdźěliło. Kaž zarjadowarjo zdźělichu bě to wopytowarski rekord. Zabawny wječor w historiskim Łužiskim seminarje steješe pod čěsko-serbskej temu.

W swojej narěči pokaza zastupowacy kulturny minister Čěskeje David Kašpar na hłuboku zwjazanosć mjez Čěskej a Sakskej. “Kulturne partnerstwo zwjaza čłowjekow geografisce, ale wosebje skrući jich daloko sahace kulturelne herbstwo.” Franciska Brechowa, nawodnica wobłuka kultura a turizm w Sakskim statnym ministerstwje za wědomosć, kulturu a turizm wuzběhny wuspěšne zhromadne dźěło na polu turizma, kotrež ma so lětsa dale wjesć.

Předsyda Domowiny Dawid Statnik podšmórny: “Tutón dom steji za naše tři kultury: za Čěsku, kotraž je dobry přećel a podpěraćel, za Němsku, kotraž je dobry partner za Serbski lud, kaž tež naše asociěrowane towarstwo Společnost přátel Lužice, kotryž je wažny partner za serbsku rěč a kulturu tu w Praze.”

Josefina Ofnerowa, nawodnica kontaktneho běrowa, podźakowa so pola wšěch partnerow za dobre zhromadne dźěło. Dale wotewrě wona dwě serbskej wustajeńcy. Wustajeńca Serbskeho instituta “Swoboda kiwa” pokazuje serbske prócowanja wo njewotwisnosć po lěće 1918. Dale móžachu sej přitomni fotowu přehladku wo lońšej Europeady wobhladać. Je to wuběr dobyćerskich wobrazow lońšeho wubědźowanja Serbskeje kulturneje informacije.

Wo wulkotny hudźbny přewod postara so serbska dwójka LeDazzo ze spěwarku Lenu Hauptmannowu a gitaristom Danom Baronom.