Zastupjerjo serbskich gremijow su so na swojim póndźelnišim turnusowym schadźowanju wo stawje financneho zrěčenja a dalšim wotběhu rozsudow w zwjazkowymaj krajomaj Braniborska a Sakska informowali.Nimo předsydy Domowiny Dawida Statnika a předsydki załožboweje rady Zuzan Šenkec su so Jan Budar, direktor Załožby za serbski lud, Kathrin Šwjelina a Marko Suchy, předsydaj serbskeju radow Braniborskeje a Sakskeje, jednaćel Domowiny Marko Kowar a zastupowacy jednaćel Marcus Końcaŕ na wuradźowanju wobdźělili. Tež předsyda parlamentariskeje přirady załožby, Marko Šiman, a serbski čłon etatoweho wuběrka Sakskeho krajneho sejma, Alojs Mikławšk (wobaj CDU) běštaj přitomnaj.Mikławšk je přilubił, so za wobkedźbowanje serbskich zajimow při parlamentariskim dojednanju etata Sakskeje 2021/2022 zasadźować. Dotalne wobzamknjenja zwjazkoweho sejma wo zwyšenju spěchowanja załožby wšitcy wobdźělnicy witachu.