Prošu wobkedźbujće tež centralny serbski kalender załožby/SKI za informacije a zapodaće (wosebje wšěch kulturnych) terminow: https://kalendar.sorben.com .

Jeli chceće terminy z wobłuka župow abo Domowinje přisłušacych cyłkow we wuběranych terminach našeho přichodneho tydźenskeho kalendra (14.11.-20.11.2022) wozjewić, pósćelće mi je prošu hač do štwórtka, 10.11., na marcel.brauman@domowina.de . Njerukujemy za zrealizowanje tule naspomnjenych podawkow.

• w přiłoze pokiw na nazymski koncert sobotu, 5.11., na žurli Serbskeho ludoweho ansambla w Budyšinje
• a tule hišće pokiw za njedźelu, 6.11.: https://sorbisches-museum.de/06-11-2022-15-uhr-kuratorenfuehrung-alles-ist-landschaft-der-sorbische-maler-jan-buck/

póndźelu, 7.11., w 9 hodź. zazběh do tydźenja – online-wuradźowanje přistajenych Domowiny pod nawodom jednaćelki Judit Šołćineje, potom wothłosowanje z předsydu

srjedu, 9.11., w 14.30 hodź. župne předsydstwo župy „Jan Arnošt Smoler” Budyšin

srjedu, 9.11., w 17 hodź. posedźenje prezidija Domowiny

srjedu, 9.11., w 17.00 hodź. dźěłowy kruh za serbske naležnosće města Budyšin

štwórtk, 10.11., w 19 hodź. w nowym gmejnskim a kulturnym centrumje w Chrósćicach zetkanje hotowarničow serbskeje katolskeje narodneje drasty – hósć: Kerstin Kaczmar (Berlin), pochadźaca z Jaseńcy. Zarjadowar: Župa „Michał Hórnik” Kamjenc.  Referentka so hižo někotre lěta ze zdrasćenjom družki zaběra a je družki při wšelakich składnosćach fotografowała. Wosebite temy wječorka: Kotry wuznam maja jednotliwe dźěle drasty? Rosće drasta sobu? Zdrasćenje – što je prawje resp. wopak? Dale chcedźa so hotowarniče wo doporučenjach wo zdrasćenju katolskeje narodneje drasty dorozumić, kotrež su w lěće 2020 wušli.

pjatk, 11.11., w 10 hodź. zetkanje předsydy Domowiny, Dawida Statnika, z Ricom Gebhardtom, předsydu frakcije Lěwicy w Sakskim krajnym sejmje, a łužiskej zapósłanču frakcije Antoniu Mertsching w Budyskim Serbskim domje

pjatk, 11.11., w 15 hodź. online-posedźenje wuběrka zwjazkoweho předsydstwa Domowiny za zjawnostne dźěło pod nawodom Krystofa Grofy

sobotu, 12.11., w 19.30 hodź. hudźbno-literarny program „Kocor & Zejler reloaded” ze skupinu „Trio a kumple”, potom kermušne reje z DJ Maikom Kretschmerom ze serbskej, jendźelskej a němskej hudźbu w „Meji” w Radworju

njedźelu, 13.11., w 15 hodź. popołdnjo za swójby w Kulowje („Jakubetzstift”). Kulturny program, bjesada při kofeju a tykancu, paslenje a zaběra za dźěći, dwurěčne klankodźiwadło. Zarjadowarjej: Župa „Handrij Zejler” Wojerecy a towarstwo „Bratrowstwo“. Zastup za dorosćenych: 2 €, za dźěći 1 €.

njedźelu, 13.11., Brigita Šramina, něhdyša županka župy „Handrij Zejler” Wojerecy, woswjeći swoje 80. narodniny

KEDŹBU: Za wšitke zarjadowanja dnja „Serbske kino” wutoru, 15.11., w Budyskim „Filmpalasće” prosy zarjadowar župa „Jan Arnošt Smoler” Budyšin wobmjezowaneje ličby městnow dla wo přizjewjenje pola Raphaele Wićazoweje pod telefoniskim čisłom 03591 550424 abo z mailku pod raphaela.wicazowa@domowina.de. Dorosćenych proša wo zastup we wysokosći 2 eurow.

• Rano w 9.30 hodź. su dźěći štyrjoch WITAJ-skupinow z třoch Budyskich pěstowarnjow na wopyće. Budu krótke dźěćace filmy pokazować, kaž na přikład Myškolinka abo Pěskowčik.
• Popołdnju w 16.30 hodź. witamy serbske swójby na najnowšu synchronizaciju Rečneho centruma WITAJ „Mała wjera”.
• A wječor w 19.00 hodź. předstajimy štyri zajimawe krótkofilmy ze stajnje jadriwym zawodom. Na programje steji mjezdruhim jedyn z prěnich filmow Sorabia Film Studia „Ludowy hercy”. Tutón powěda wo serbskich ludowych hercach, předstaji ludowe instrumenty Łužicy a informuje wo stawiznach hudźbneje kultury. Druhi přinošk je filmowy portret molerja, folklorista a spisowaćela Ludvika Kuby (1863-1956) „Njepřetrachu jenož mólby”, kotryž je wjace króć Łužicu wopytał, mjez druhim zběrku serbskich ludowych spěwow wudał a wjace hač 100 wobrazow ze serbskimi motiwami molował. Třeći film je přinošk skupiny TransKultTV z 1990tych lět. Běše to skupina serbskich amaterow-entuziastow, kotraž wjerćeše po přewróće prěnje telewizijne magaciny w serbskej rěči a mjenowaše přinoški „Serbske wokno”. Štwórty film je film wuměłče Maje Nageloweje, kotraž posłužuje so na zdokonjane a přeswědčiwe wašnje modernych wizuelnych technikow.

(info: Leńka Thomasowa, župa Budyšin)