Na swjatočnym zarjadowanju je předsyda Domowiny Dawid Statnik dźensa wječor w Budyšinje angažowanym Serbowkam a Serbam Myto Domowiny, Myto Domowiny za dorost a Čestne znamješko přepodał.
“Tři wodźace słowa Domowiny - zamołwitosć, wotewrjenosć a zwjazanosć - steja zastupujo za skutkowanje dźensnišich mytowanych a charakterizuja hódnoty, za kotrymiž stejimy.”, tak předsyda Domowiny. Wón dźakowaše so mytowanym za dołholětne a angažowane čestnohamtske dźěło za serbski lud. Dale wuzběhny, zo čestnohamtscy ze swojim dźěłom nimo toho rozsudnje k tomu přinošuja, zhromadny cil docpěć: Hač do lěta 2100 měć 100.000 serbšćinu rěčacych. Předewzaće, ke kotremuž mnozy přinošuja.

Nimale wšitcy mytowani su na dźensniše mytowanje přichwatali. Hudźbne wobrubjenje přewza skupina Holaski, kotraž bu nimo toho z Mytom Domowiny za dorost 2024 wuznamjenjena. Lawreatka Myta Domowiny 2024, Regina Šołćina zhladowaše z dźaknymi słowami do přichoda: “Běchmy, smy, budźemy.”

Foto: Domowina/Jurij Helgest

Myto Domowiny 2024

Regina Šołćina z Konjec
Za wjele lět mnohostronskeho čestnohamtskeho dźěła za serbski lud je sej Regina Šołćina Myto Domowiny zasłužiła. Wona je Serbowka z ćěłom a dušu, kotraž njebojaznje za swój lud wojuje.
Serbskosć hraje we wšitkich wobłukach jeje žiwjenja wulku rólu. Mjez druhim je 18 lět Domowinsku skupinu Konjecy-Šunow nawjedowała. Dale je Serbsku lajsku dźiwadłowu skupinu Šunow-Konjecy sobu załožiła a steješe mnohe lěta sama na jewišću. Tak skutkowaše w 15 wulkich inscenacijach sobu, je šěsć wulkich dźiwadłowych hrow z němčiny do hornjoserbšćiny přełožiła. Nimo toho pisa wot prěnjeho dnja akribisce chroniku lajskeje dźiwadłoweje skupiny. Tež kubłansko-politisce so angažuje. Tak so w lěće 2001 nimale wot wšeho spočatka na wšědnych protestach přećiwo zawrjenju Chróšćanskeje serbskeje srjedźneje šule wobdźělowaše. Mjeztym je jedna z poslednich žonow, kotrež wšědnje w drasće katolskich Serbowkow chodźa. Za narodne dźěło spožči so jej 1997 Čestne znamješko Domowiny.

dr. Michał Hajdan z Drjowka
Na iniciatiwu dr. Michała Hajdana su serbske temy we wokrejsu Sprjewja-Nysa pśecej kšuty wobstatk w parlamentariskem źěle. 25 lět dłujko jo wón pśisłušał wokrejsnemu sejmoju, za wokrejs Chóśebuz a wót 1993 za wokrejs Sprjewja-Nysa. Dr. Hajdan jo zawjadł, až se na kuždem pósejźenju wokrejsnego sejma wótpósłańce a gósći na serbski póstrowiju. Hajdan jo politiku a wokrejsne zastojnstwo pśecej pogonił hyšći wěcej za serbsku rěc a serbsku kulturu gótowaś. Na jogo iniciatiwu jo se załožyło w lěśe 1998 rownopšawny wuběrk za serbske nastupnosći. Wokrejs Sprjewja-Nysa jo był z tym ten prědny wokrejs (a jo bóžko až do źinsajšnego ten jadnučki), w kótarymž eksistěrujo jaden samostatny serbski wuběrk, kenž ma samske pšawa ako wšykne druge wuběrki parlamenta. Pěś lět jo Hajdan toś ten wuběrk sam nawjedował a až do źinsajšnego jo wón jogo cłonk. Na sportojskem pólu pódpěrujo Michał Hajdan wót wšogo zachopjeńka serbskich balokoparjow. W aprylu 2017 jo był teke załožařski cłonk spěchowańskego towaristwa „Serbske koparje“.

Sonja Hrjehorjowa ze Sulšec
Angažowana Serbowka wjedźe jako dołholětna předsydka towarstwa „Bratrowstwo” z wulkim elanom towaršnostne žiwjenje katolskich Serbow Kulowskeje wosady. Wona je zamołwita za najwjetši rěčny rum Serbstwa we Wojerowskim regionje. Mjez druhim stara so wo dźiwadłowu skupinu Bratrowstwa, skutkuje jako dźiwadźelnica abo stara so za kulisami wo organizaciju a koncepciju. Nimo toho je aktiwna w radźe Zhorjelskeje diecezy a w Centralnym komiteju katolikow Němskeje. Kooperacija z ewangelskimi křesćanami je jej samozrozumliwosć runje tak kaž wotewrjena wuměna z ludźimi wšelakeho swětonahlada. Hač jako čłonka jury we wubědźowanju wo najrjeńše serbske jutrowne jejko dźěći a młodostnych abo w njeličomnych projektach kołowokoło serbskeje rěče a kultury předewšěm we Wojerowskim regionje – spjelnja nadawki we winicy Serbstwa přeco wjesele a w dobrej wzajomnosći. Wona zasadźuje so za to, we Wojerowskich wsach zaso sylny štom serbskeje identity narosće. Jako wolena čłonka skutkuje sotra Hrjehorjowa tež we Wojerowskim župnym předsydstwje.

Lucija Handrikowa ze Smjerdźaceje
Jako nazhonita kubłarka přewza Lucija Handrikowa w septembru lěta 2000 wužadacy nadawk: organizatorisku a wobsahowu zamołwitosć za Serbske kubłanske a swójbne srjedźišćo LIPA w Smjerdźecach. Zetkawanišćo w delanskej kónčinje stara so wo kubłanske poskitki za wšitke generacije. Serbskosć je samozrozumliwy stołp. W jeje skutkowanju bě bytostnje, zo njejsu poskitki LIPY kopije Ludowych šulow, ale zo nańdu so nowe formy a wobsahi. Hižo w druhim lěće skutkowanja LIPY nasta poskitk za rozmołwne kruhi staršich z dźěćimi - nowum w Serbach. Serbske dźěći su fokus w LIPJE. Hač při sportowych a gymnastiskich kursach, šiću abo druhich aktiwitach – serbšćina je přeco prezentna. Lucija Handrikowa zaručeše dale lětne čłonske zhromadźizny w zwisku z fachowej konferencu. Tute zarjadowanja běchu stajnje dobra składnosć, za wjacerěčnosć wabić a sej hódnotu serbskeje rěče wuwědomić. Być dom za wšě generacije – to bě a je Lipa. Hižo druhe lěto přewjedźe so specielny kružk za wuměnkarjow.

Myto Domowiny za dorost 2024
čłonojo skupiny “Holaski” z Chrósćic

Čestne znamješko Domowiny 2024
dr. Křesćan Kessner z Lohmen
dr. Annett Brězanec z Hornjeje Hórki
Marcel Hoza z Worklec
Juro Gera ze Žylowa
Peter Löffler z Chóśebuza
Měrko Korjeńk z Małeho Wjelkowa
Marina Kosakowa z Brětnje
Judith Škodźina z Pančic-Kukowa
Pětr Cyž z Budyšina
Ondřej Šrámek z Prahi