Jutře, wutoru, 11. róžownika/meje wopyta społnomócnjeny zwjazkoweho knježerstwa za wuchodnu Němsku, Marco Wanderwitz, parlamentariski statny sekretar zwjazkoweho ministerstwa za hospodarstwo a energiju, w 11.30 hodź. Serbski dom w Budyšinje. Na dnjowym porjedźe předwidźaneje połdrahodźinskeje rozmołwy steja temy „dwurěčna Łužica – regionalna jónkrótnosć; změna strukturow jako wužadanje a šansa; wuznam serbšćiny w hospodarstwje a na dźěle.” Na rozmołwje so wobdźěła:

Dawid Statnik, prědsyda Domowiny; Jan Budar, direktor Załožby za serbski lud; Marco Wanderwitz, społnomócnjeny za nowe zwjazkowe kraje; Marko Šiman, serbski zapósłanc frakcije CDU sakskeho krajneho sejma z Budyšina; Roland Ermer, prezident třěšneho zwjazka rjemjesła w Sakskej („Sächsischer Handwerkstag“), Marja Michałkowa, čłonka zwjazkoweho předsydstwa Domowiny a něhdyša zapósłanča zwjazkoweho sejma; Udo Wićaz, prěni přirjadnik w krajnoradnym zarjedźe Budyšin; Pětr Brězan, referent Domowiny za hospodarske a infrastrukturelne naležnosće; Marcel Brauman, nowinski rěčnik a wosobinski referent předsydy Domowiny.

Wuradźowanje budźe wuměnjenjow pandemije dla na žurli Serbskeho domu w Budyšinje. Najebać to, zo so jutře popołdnjo zdźělenka Domowiny ze zjimanjom ze serbskeho wida a pisomnym statementom Dawida Statnika a Jana Budarja atd. wozjewi, poskićamy wězo medijam po rozmołwje termin na městnje:

Termin za fota, o-zwuki a naprašowanja žurnalistow pola wobdźělnikow na 1. poschodźe Budyskeho Serbskeho domu: wutoru, 11.5., w 13 hodź. – Marco Wanderwitz zapisa do złoteje knihi Domowiny. Po tym budźe tež składnosć za fotografowanje, mjez druhim před Serbskim domom na Póstowym naměsće.

 Maće-li hišće prašenja, móžeće so radlubje kóždy čas na mnje wobroćić. Rjenje by było, hdyž móžeće so resp. fotografa/fotografowku za termin přizjewić, pak telefonisce pak jako wotmołwu na tutu mejlku.

Informacije wo wosobje, kiž je politikar ze Sakskeje: BMWi - Marco Wanderwitz