Domowina je swoje stejišćo k planej syće šulow wokrjesa Budyšin zapodała. Poziciju z potrjechenymi, wosebje z nošerjemi serbskich šulow, zastupjerjemi třěšneho zwjazka w šulskich konferencach, ze Serbskim šulskim towarstwom (SŠT) a z kubłanskim wuběrkom zwjazkoweho předsydstwa wothłosowawši so předsyda Domowiny, Dawid Statnik, wupraja: „Wokrjes Budyšin je po swojim sebjezrozumjenju tež ,serbski wokrjes’ a domizna najwjac šulow z poskitkom wuwučowanja na maćernorěčnym niwowje po cyłej Łužicy. Z by wokrjes tutomu narokej přichodnje hišće lěpje wotpowědować móhł, smy jako třěšny zwjazk Serbow nimale 20-stronske stejišćo z pokiwami zapodali.W srjedźišću steji njedostatk rumnosćow, wšako so tworjenje skupinow po rěčnych kmanosćach w ramiku modela 2plus dosć njewobkedźbuje. Potrjebu rozšěrjenja kapacitow widźimy na wjacorych stejnišćach, wosebje pak w serbskim gymnaziju w Budyšinje. Tule smy so tež na list staršiskeje rady šulskemu zarjadej złožili, kotryž smy w swojim zapodaću dokumentowali. Woni su na to skedźbnili, zo je 26 procentow šulerjow gymnazija z gmejnow Chrósćicy, Njebjelčicy, Pančicy-Kukow a Worklecy, za kotrež je porno přerězkej teritorija wokrjesa dołhodobnje pozitiwneje prognozy wuwića wobydlerstwa. Tohodla njesmě so za jenički serbski gymnazij po cyłej Sakskej po powšitkownym trendźe planować.Ze specifiskej problematiku je serbska wyša šula Radwor konfrontowana: Wona je sewjernje Budyšina po zawrjenju srjedźneju šulow w Rakecach a Wulkej Dubrawje jenička tajka statna šula w tutych kónčinach. Nimo toho chodźa tež wotchadnicy zakładnych šulow bjez serbšćiny do Radworskeje wyšeje šule. Woboje zwyša podźěl šulerjow bjez předznajomnosće serbšćiny a haći serbske wuwučowanje. Tohodla Domowina znowazałoženje statneje wyšeje šule poruča. So wě, zo kładźemy wažnosć na prawe pomjenowanje šulow, zo njeby na přikład ,Šula Ćišinskeho’ po planje dale ,Sula Cisinskeho’ wostała – tež tajke pokiwy dyrbjachmy we wjetšej ličbje sposrědkować. Najebać to, zo je transport šulerjow swójska tema, smy składnosć wužili, kritisce přispomnić, zo su šulerjo do serbskeho gymnazija zdźěla dlěje hač 45 mjeńšin po puću abo zo maja šulerjo mjez Nuknicu a Worklecami při přestupjenju hač do 30 mjeńšin čakać. Za pozitiwne mamy, zo su naše šule ze serbskim lipowym łopješkom w planje syće šulow markěrowane a z tym jako něšto wosebite wuzběhowane. W cyłku móžemy přirost sensibility a kedźbnosće za serbske kubłanske naležnosće zaznawać a chcemy ze swojim stejišćom tute wuwiće zesylnjeć.”w přiłoze kompletne stejišćo (jako PDF)