K aktualnemu połoženju korona-pandemijie tež w Serbach so předsyda Domowiny, Dawid Statnik, wupraja:„Je drje wo politiskich postajenjach korony dla wšelakich měnjenjow, fakty pak su jasne: Mamy dźeń a wjac bjezposrědnje wot korony potrjechenych ludźi, pak natyknjenych pak w kwarantenje, a jich je samo wjac hač na próze lockdowna w nalěću. Tohodla dyrbimy za naše wjeski runja zamołwitym politikarjam z widom na cyły kraj zwěsćić: Tak njepóńdźe dale – jeli nochcemy, zo bórze lěkarjo wotwažować dyrbja, kotrym na smjerć chorym pacientam hižo pomhać njemóža, dokelž je kapacita chorownjow wučerpana.Pandemija je nam naprašowanje: Fungujemy hišće jako towaršnosć w cyłku abo smy roztřěskani do dale a mjeńšich zaměrowych skupin, kotrymž je njespokojenje indiwiduelnych potrjebow najwjetša katastrofa. Hladajo na eksponencielnje stupace ličby rozpřestrěwanja korona-wirusa zašłe tydźenje dyrbimy so sebjekritisce prašeć, hač su naše wašnja so zetkawać pod tutymi wuměnjenjemi ludźom a towaršnosći na škodu byli. Domowina budźe přepruwować, kotre praktiske konkluzije mamy z aktualneho połoženja sćahnyć. Dźělny lockdown njech je nam składnosć hłubšeho přemyslowanja, kak chcemy z wužadanjom pandemije dale wobchadźeć. Dokelž fakt je: Naše dotalne strategije njedosahaja, a tuta pandemija budźe nas hišće dlěje přewodźeć, hač je nam lubo. W prěnim lockdownu smy so wjele noweje wědy nasrěbali, z digitalnymi srědkami a w mjeńšich kruhach zhromadnje jako serbski lud skutkować. To móže nam nětko pomhać.” PS. MB: Naš serwer tuchwilu njefunguje, tohodla mejlowanje na tutym puću.