Na přeprošenje pósłanca Čěskeje republiki Jiříja Čisteckeho wobdźěli so předsyda Domowiny Dawid Statnik wčera wječor na přijeću w Drježdźanach. Běše to prěni wopyt pósłanca w Sakskej, na kotrymž so dohromady dźewjeć wosobow z hospodarstwa, politiki a wědomosće wobdźělichu. Wot 23. oktobra 2024 je Jiří Čistecký społnomócnjeny wulkopósłanc Čěskeje w Němskej.

Dołholětne serbsko-čěske styki su Serbam na mnohich polach wužitne. Tak spěchuje Čěska na přikład jedne wučerske městno za wuwučowanje čěšćiny na serbskich šulach. We wosobinskej rozmołwje z pósłancom pokaza předsyda Dawid Statnik na wažnosć Łužiskeho seminara w Praze jako sydło Společnosće přátel Lužice a Sakskeho zastupnistwa a dźakowaše so pósłancej zastupujo za podpěru Čěskeje.

Njebě to prěnje zetkanje wulkopósłanca ze Serbami. W jeho něhdyšej funkciji jako referent wonkowneho ministerstwa přewodźa Jiří Čistecký tehdyšeho čěskeho wonkowneho ministra Karela Schwarzenberga w lěće 2012 na wopyće w Budyšinje.

Na přijeću wobdźěleštej so tež dalšej Serbaj – něhdyši ministerski prezident swobodneho stata Sakska Stanisław Tilich a zapósłanc Sakskeho krajneho sejma Marko Šiman.

Foto (Domowina): předsyda Dawid Statnik, bywši ministerski prezident swobodneho stata Sakska Stanisław Tilich, Katerina Moravcova (mandźelska pósłanca), čěski pósłanc Jiří Čistecky, zapósłand Marko Šiman (wotlěwa)