Zwjazkowe předsydstwo Domowiny je so na swojim dźensnišim posedźenju ze swojej dźěławosću jako gremij zaběrało. Zakład bě naprašnik kotryž su čłonki a čłonojo njedawno wupjelnili. Měrjo so na hłownu zhromadźiznu zaběrachu so na přikład z prašenjom, kak móhli nowe čłonki abo nowych čłonow za dźěło w gremiju zdobyć. Wšitcy maja swoje čłonstwo w gremiju zasadnje za wažne. Diskutowali su tež wo optimalnych wuměnjenjach za diskusiju – hač hybridnje, na městnje abo kreatiwnje – w skupinskim dźěle. Dawid Statnik, předsyda Domowiny tomu: “Čestnohamtske dźěło njeměło być jenož winowatosć, ale tež wjeselo a wuměna.”

Wósebne pśipóznaśe młodeje ekscelence w dolnoserbšćinje

Wjednik wótźělenja RCW Bernd Melcher pśedstajijo nowe wuznamjenjenje: Wósebne pśipóznaśe młodeje ekscelence w dolnoserbšćinje pósćijo se prědny raz na pśiducem wobradowanju zwězkowego pśedsedaŕstwa, dnja 29.11.2024 w Kulowje.

Lětnje złožyju wuknjece w Rěcnem centrumje WITAJ Chóśebuz certifikatowe pśespytowanja pó zgromadnem europejskem referencnem ramiku za rěcy. Wósebne pśipóznaśe ma póstupjonych wuknjecych na dolnoserbsku zgromadnosć wězaś a drugich za wužywanje rěcy motiwěrowaś. Z certifikatom C1 a dobrymi wuslědkami dopokazuju swóju wusoku rěcnu kompetencu a budu potencielne źěłowe mócy za serbske institucije. Toś to pśipóznaśe spěchujo nawuknjenje dolnoserbšćiny na wusokem niwowje, trěbne za literaturu, wědomnosć a kubłanje a pódpěrujo zaměry Domowiny a Załožby za serbski lud, rěc a kulturu zachowaś a dalej wuwijaś.

Z rozprawy župy “Jan Arnošt Smoler” Budyšin

Županka Leńka Thomasowa rozprawješe wo aktualnej situaciji w župje “Jan Arnošt Smoler”. W dwanaće Domowinskich skupinach a w štyri zapisanych towarstwach su 438 čłonow (staw: 03/2024) aktiwnych. “Loni je so nowe župne předsydstwo woliło a z nowymi čłonami tež womłodźiło”, tak županka. Nalětnje a nazymske koncerty Domowiny běchu jara derje wopytane. Pozitiwnje wona wuzběhny, zo je Domowina organizaciju zarjadowanjow přewzała. Přichodny nazymski koncert budźe 16.11.24 w Radworju, na kotrymž wustupi žónski ansambl „Jarobinka“. Přizamknu so kermušne reje.

Lětuše zarjadowanja towarstwow a župy so derje přiwzachu. Tež dorost so angažuje. Tak skutkuje župa w cyłej regionje, hač z kermušu w Hodźiju abo z pućowanjom w Bóšicach.

Njedźelu zetka so županka w Njechornju z wobydlerjemi resp. tamnišimi susodami, zo bychu wo dalewuwiću doma Měrćina Nowaka-Njechorńskeho wuradźowali.

Z rozprawy Serbskeje rady při krajnym sejmje w Sakskej

Čłonka bywšeje rady za serbske naležnosće Sakskeje Diana Šołćina rozprawješe wo dźěławosći w dobje 2020 – 2024. Tak je so gremij wuspěšnje za skrućenje swojeho dźěła zasadźował. Nowa jednaćelnja ma čestnohamtske dźěło gremija podpěrować. Wona wuzběhny, zo je so zhromadnje ze zapósłancami radźiło, financowanje Serwisoweho běrowa zwyšić a pawšale za gmejny w sydlenskim rumje zdźeržeć.

Wulke wužadanje je dale kubłanje. Tak widźi Šołćina potrjebu zakońske a zarjadniske rjadowanja na dobro šulstwa dale polěpšić. W tutym zwisku podpěruje rada runja Domowinje žadanja Serbskeho šulskeho towarstwa za polěpšenje šulstwa.

Serbska rada je wobsaham šěsteje rozprawje Sakskeho statneho knježerstwa k połoženju Serbow přidźěłała. Z wida rady je nuznje trjeba, zo maja so wuskutki a rozrisanja jasnje hódnoćić a trěbne naprawy wuwić. Do přichoda je Serbskej radźe wažne, zo matej rada a třěšny zwjazk Domowina dale stejišćo k rozprawje zabrać.