Serbski kšywowy zwězk Domowina a wokrejs Górne Błota-Łužyca kśě w pśichoźe hyšći wusčej gromadu źěłaś, aby zmócnili serbsku rěc a kulturu ako wósebne znamje regiona. To jo wuslědk rozgrona krajnego raźca Siegurda Heinze (njejo cłonk strony), zagroniteje za serbske nastupnosći wokrejsa, Hanki Rjelcyneje, pśedsedarja Domowiny Dawida Statnika a regionalneje powědaŕki Domowiny za Dolnu Łužycu, Heike Apelt, pónjeźele w krajnem zastojnstwje we Złem Komorowje. K starodawnemu sedleńskemu rumoju Serbow we wokrejsu OSL lice Lubnjow/Błota, Wětošow/Błota, Kalawa, Zły Komorow a gmejny Nowa Jazorina a Nowe Wiki w amśe Stara Darbnja.

Krajny raźc Heinze jo wuzwignuł wuznam městna zagroniteje za wokrejs a jo gódnośił “wěcny a měrny angažement” zagroniteje za serbske nastupnosći, kenž źo cełkownje na dobro wokrejsa. Pśedsedaŕ Domowiny Statnik jo pódšmarnuł pśinosk kšywowego zwězka k zwězanosći z domownju cełeje ludnosći, pśeto se pósrědnijo póchad dłymoko w regionje zakórjoneje kultury ako trajuca gódnota. Toś ta ma nic naslědku dla turizma rosćecy wuznam. Rjelcyna wiźi stawnu komunikaciju wósebnje z komunalnymi zagronitymi ako wažny nadawk w słužbje wupominanja, serbskej kulturje a rěcy wěcej zjawnosći w regionje wudobywaś. Regionalna powědaŕka Domowiny Heike Apelt žycy sebje pódłymjenje zgromadnego źěła wokrejsow serbskego sedleńskego ruma teke na pólu młoźinskego źěła.

W rozgronje su teke rolu grali aktualne pšašanja w zwisku ze strukturneju změnu. Pśi tom jo wobstojała wobjadnosć, až trjeba region góspodaŕski spušćobne ramikowe wuměnjenja, aby se wobydlaŕstwoju a srjejźnym pśedewześam na droze wótstupjenja wót wugla njetrjebne njewěstosći njenapórali.

Dalšny program, kenž jo zagronita za serbske nastupnosći gósćam organizěrowała, jo stojał kradu w znamjenju wuměny myslow z kulturnymi akterami na městnje. Droga jo jich wjadła nejpjerwjej k Cornelii Schnippa w Lěskej, cłonk pśedsedaŕstwa towaristwa “Serbski kulturny turizm z. t.”. Wóna jo wuwitała kupku na tradicionelnu serbsku wašnju z klěbom a solu a jo wujasniła staw saněrowanja starego doma z wobstśasanego drjewa ako teke wjelebocne aktiwity, nic naslědku tek wjeźenja pó měsće Wórjejce w serbskej drastwje.

Pón stej jich muzeumowy direktor Stefan Heinz a jogo sobuźěłaśeŕka za zjawnostne źěło, Jenny Linke, pśez Muzeum grod a twardnica Zły Komorow wjadlej. Wósebnje zaśišć jo gótowała na pśedsedarja Domowiny pśikładna kooperacija muzeumowych městow wokrejsa w Lubnjowje, na Lědach a Złem Komorowje z w tej chyli lětnje 170.000 woglědarjami. Źeń zakóńcyło jo rozgrono z Ginterom Pawlišom, pśedsedarjom Domowinskeje kupki Zły Komorow, kótaryž se wósebnje teke za wóžywjenje dolnoserbskeje rěcy w měsće a wokolnych jsach angažerujo.

Statnikowy rezimej: “Jo wiźeś a zacuwaś how na městnje, kak se zawjeźenje głownoamtskich zagronitych za serbske nastupnosći w Bramborskej pozitiwnje wugbajo. Wokrejs Górne Błota-Łužyca ze swójimi śěžyšćami Błota a Jazorina w srjejźi serbski pregowaneje Łužyce dostawa wažnu rolu”.