Na přeprošenje předsydy Domowiny Dawida Statnika zetkachu so dźensa, 12.11.2024, županki/županojo a předsydki/předsydźa župow a towarstwow. Na planje steješe mjez druhim přihot hłowneje zhromadźizny, 05.04.2025 w Budyšinje, dalewuwiće Domowinskeje webstrony a wjerški a terminy za přichodne lěto. Tež diskusija při blidach steješe na planje – zdobom premjera za tute zetkanje.

Přihot hłowneje a wólbneje zhromadźizny

“Našu přichodnu hłownu zhromadźiznu chcemy wožiwić. Za to chcemy na přikład mnohostronske móžnosće w Serbskim ludowym ansamblu wužiwać”, tak předsyda Dawid Statnik. Nimo wólbow a dźěłowych temow, kaž program Domowiny a z tutoho wuchadźace dźěłowe směrnicy za dobu 2025-2027, maja so tež dalše temy wobdźěłać.

Diskusija wo změnje někotrych dypkow wustawkow so tuchwilu přihotuje. Tak njeje na přikład pomjenowanje třěšneho zwjazka w rěčnych wersijach jednotne. Jako přichodne budźe so prawniski wuběrk z naćiskom wustawkow zaběrać.

Předsyda prosy župy a towarstwa hižo nětko za kandidatkami a kandidatami za wólby organow pytać.

Při blidach diskutowachu přitomni wo dalšich móžnych temach. Tak maja na přikład zajim na aktualnych rěčnych projektach (ZORJA, ZARI).

Wonkowny wobraz Domowiny a nowa webstrona

Tuchwilu dźěła zarjad Domowiny na předźěłanju webstrony, kaž tež na zasadnym wustupowanju Domowiny. Nowa webstrona ma přehladniša być a so na techniski aktualny staw dalewuwić. Zdobom změje kóžda župa a čłonske towarstwo móžnosć swójsku podstronu wuhotować.