Wčera konstituowaše so pod nawodom předsydy Domowiny Dawida Statnika nachwilny dźěłowy wuběrk Domowiny, kotryž ma so zaběrać ze strukturu gremijow załožby.

Nachwilny dźěłowy wuběrk bě Zwjazkowe předsydstwo Domowiny na swojim januarskim posedźenju zwołał. Wuchadźišćo bě rozprawa nětčišich serbskich čłonkow a čłonow załožboweje rady, kotruž su tute na nowemberskim posedźenju zašłeho lěta třěšnemu zwjazkej podali. Wjacori čłonojo rady wuprajichu so při tym za to, wo strukturje załožboweje rady sameje znowa rozmyslować.

W tutym zwisku namjetowaše so mjez druhim, w załožbowej radźe gremij tak mjenowanych “serbskich ekspertow” wutworić. Zaměr měł při tym być, struktury tak natwarić, zo bychu wone časowej nałožbje wotpowědowali. Serbscy radźićeljo załožboweje rady njejsu samostatny organ, ale jenož dźěl cyłkowneho organa załožboweje rady. Za zhromadne dźěło z druhimi gremijemi měł so po słowach čłonow rady serbski cyłk w załožbowej radźe w přichodźe hinak organizować.

Čłonojo wuběrka dojednachu so wčera na dźěłowy plan. Předwidźane je, wotpowědnje rozsudej zwjazkoweho předsydstwa, tutomu w nowembrje předpołožić dopóznaća a namjety.

Runje tak dojednachu so, w tutym procesu po potrjebje tež dalšich ekspertow słyšeć.

Tež chcedźa so na Serbskeju radow Sakskeje a Braniborskeje wobroćić, wšako měłoj tež wonej so naležnosći wuprajić. To wosebje, dokelž woli w Braniborskej tamniša rada dweju rjadnych a dweju zastupowacych čłonow do załožboweje rady.

Na posedźenju wuběrka wobdźělichu so nimo předsydy Domowiny tež městopředsyda Domowiny dr. Hartmut Leipner, předsydka załožboweje rady Susann Šenkec a čłonojo załožboweje rady Bjarnat Cyž, dr. Daniel Měrćink, Marlis Młynkowa a Julian Nyča, kaž tež hłowna jednaćelka Domowiny Judit Šołćina.