Srjedu, 30.3., popołdnju, wotmě so 2. posedźenje wuběrka Domowiny za nutřkownu demokratiju a serbsku ciwilnu towaršnosć pod nawodom Damiana Dyrlicha. Čłonojo gremija zwěsćichu, zo je komunikacija wažny aspekt, ludźi za sobudźěło w Domowinje zdobywać a jim dźěławosć třěšneho zwjazka zbližić – tohodla je do wólbow wjac specifiskeho wabjenja trěbne. K tomu słušeja wulkozarjadowanja abo tež informaciske srědki kaž newsletter. W přichodźe chce so wuběrk intensiwnišo z prašenjom zaběrać, kotru rólu hraja swětne a nabožne nałožki resp. tradicije za wutworjenje narodneje identity, informowaše za wuběrk přisłušna referentka za naležnosće třěšneho zwjazka, Madlena Di Sarnowa.