Tuchwilu přewjedu so sonděrowanske rozmołwy mjez CDU, BSW a SPD w Sakskej. Domowina je tutym stronam žadanja Serbow na koaliciske jednanja Sakskeje přepodała (tule jako PDF-download).

Mjez druhim žada sej zawjazowace přilubjenja wo zaručenju prawow serbskeho ludu. Wuslědki wólbow krajneho sejma 2024 a zesylnjenje prawicarskoekstremistiskich a populistiskich stronow starosća Domowinu. Rěčne a kulturne wudobyća zašłych lět su wohrožene. Tute aktualne wuwića pokazuja, zo njeje škit serbskeje identity, rěče a kultury samozrozumliwosć. Domowina žada sej tuž zawjazowace a konkretne přilubjenja, zo bychu so prócowanja Serbow, rěč a kulturu zdźeržeć, zmóžnili a polěpšili. W minjenych lětach připowědźene a zahajene naprawy wočakowanjam njewotpowěduja, wosebje nic na polu kubłanja. Njedostatk wokoło wučerjow wohrožuje wučbu w serbskej rěči. Najebać zahajene naprawy pobrachuje dołhodobne zawěsćenje.

Dawid Statnik, předsyda Domowiny wuwjedźe tomu: “Domowina sej žada, zo koalicija zawjazowace kročele w koaliciskim zrěčenju postaji a zapisa. Tute maja powšitkowne wuznaća přesahować a prawa na wšěch runinach – hač na runinje kraja, wokrjesa abo komuny – zawěsćić. Krajne knježerstwo Sakskeje dyrbi serbski lud při škiće rěče a kultury aktiwnje podpěrować.”