Pod titulom “Digitalna změna za medije mjeńšinowych rěčow w Italskej a Němskej: Europscy partnerojo so mjez sobu wuměnjeja” zetkaše so něhdźe dwaceći wědomostnicow a wědomostnikow 2. do 5. decembra na wědomostnej konferency w sewjeroitalskim Menaggio. Cil zetkanja běše wuměna wo aktualnych situacijach a wužadanjach medijoweho sektora mjeńšinowych a regionalnych rěčow. Ze serbskeje strony wobdźělištej so sobudźěłaćerce projekta ZARI, syće za serbsku rěč a regionalnu identitu, prof. dr. Nicole Dołowy-Rybińska a Alena Pawlikec.

W šěsć diskusijnych kołach rozprawjachu wobdźělnicy wo swójskich slědźenjach a přirunowachu situacije medijow w jednotliwych europskich mjeńšinowych a regionalnych rěčach. Katalanow a Šwedow we Finskej zaběra na přikład, kak a w kotrej měrje měło so dźěło ze socialnymi medijemi do wukubłanja žurnalistiskeho dorosta zapřijeć. Za Frizow w Němskej zaso je wažne, sej wjac dźěłowych městnow a wusyłanskeho časa za swoju rěč zdobyć.  Wobstejace dźěłowe městna wobsadźić a z tučasnej ličbu sobudźěłaćerjow dalše medijowe formaty wobhospodarić, kaž na přikład medijowe kanale w socialnych syćach, je mjez druhim wužadanje za Serbow.

Wobdźělnicy wudźěłachu zdobom namjety za naprawy, kotrež maja přichodnje medijowy sektor mjeńšinowych a regionalnych rěčow podpěrować. Namjety tworja zdobom zakład za tučasnje nastawacu syć COST Action “Rěčna mnohotnosć w změnje medijoweje sfery w Europje” (PLURILINGMEDIA), kotraž ma w přichodźe zwjazować akterow z wědomosće a medijoweje praksy.

Konferencu, kotraž bu spěchowana přez Němsko-italski centrum za europski dialog, běštaj organizowałoj Europski centrum za mjeńšinowe naležnosće (ECMI) we Flensburgu a Eurac Research w Bolzano w Italskej. 

Kontakt:

Alena Pawlikec, wědomostna sobudźěłaćerka

ZARI – Syć za serbsku rěč a regionalnu identitu
E-mejlka: alena.pawlikec@domowina.de
Telefon: + 49 3591 316 3856