Z postrownymi słowami wjacorych politikarjow – ministerkow dr. Eva-Maria Stange ze Sakskeje a dr. Martina Münch z Braniborskeje kaž tež Zhorjelskeho krajneho rady Bernda Lange - zahaji so štwórtk, 13. septembra, dwudnjowska konferenca k strukturnej změnje we Łužicy ze serbskeho wida. Wotewrěłoj staj ju předsyda Domowiny Dawid Statnik a decernentka wokrjesa Zhorjelc Heike Zettwitz.

Łužica njeje předstajomna bjez serbskich stawiznow a identity, tak ministerka Stange. Wona pozbudźi přitomnych, swójske ideje wuwić, sej jich zwoprawdźenje pominać a so ze swójskimi idejemi na procesu strukturneje změny wobdźěleć, zo bychu tež wnučki we Łužicy přichod měli. Za to su trěbne dźěłowe městna, kiž wobsteja w konkurency wo dźěłowe mocy po cyłej Němskej, kedźbnosć nadregionalnych medijow a zasydlenje nowych předewzaćow.

We Łužicy so w přichodnych tydźenjach wažne wuhibki (Weichen) za strukturne wuwić staja a Serbja su při tym wažni partnerjo, tak ministerka Münch. Zhromadne žiwjenje we Łužicy z respektom před kulturnej diwersitu - to su resurcy a kompetency, kiž maja so do diskusije wo strukturnemu wuwiću zapřijeć a tuta konferenca je za to wažny měznik.

Potom slědowachu wjacore přednoški, mjez druhim na temy “Transformacija Łužicy a Serbja” (Daniel Häfner, Braniborska techniska uniwersita), “Starodawny sydlenski rum Serbow – wuchadźišćo europskeho kompetencneho regiona za wjacerěčnosć?” (Měto Nowak, referent zamołwiteje za serbske naležnosće w Braniborskej), “Digitalizacija jako šansa za Serbow – što ma so činić?” (Jan Budar, direktor Załožby za serbski lud) kaž tež “Potenciale UNESCO-konwencije k zdźerženju imaterielneho kulturneho herbstwa za Serbow a Łužicu” (Anita Szczukowski, Serbski institut).

Konferenca pjatk wot 9 hodź. w Złym Komorowje, Uniwersitne naměsto 1, pokročuje. Dalšimaj přednoškomaj přizamknje so šěsć dźěłarničkow, w kotrychž chcedźa nadrobne předstawy wo jednotliwych aspektach strukturneje změny wuwić. Konferenca je zjawna a wobdźělenje je hišće móžno.