Kubłanje w serbskej rěči je tema wšěch serbskich institucijow, wone zaběra wučerjow a kubłarjow, dźěći, staršich, dźědow a wowki. Tola tuchwilne prócowanja, tak zwěsćichu při lońšej ewaluaciji Witaj-kubłanja w zakładnych šulach Delnjeje Łužicy, njenjesu te płody, kiž mnozy wočakuja a kiž su trěbne za zachowanje aktiwnje nałožowaneje delnjoserbšćiny do přichoda. Tohodla a wotpowěduju próstwje lětušeje hłowneje zhromadźizny župy Delnja Łužica je Zwjazkowe předsydstwo Domowiny na swojim posedźenju dnja 15. februara wobzamknyło, w aprylu přewjesć kubłansku klawsuru. Wotpohlad klawsury měł być, wuslědki Witaj-ewaluacije wobjednać.Rěčny centrum WITAJ (RCW) je klawsuru we wothłosowanju ze župu Delnja Łužica přihotował a dnja 10. apryla we wjacezaměrowej hali Delnjoserbskeho gymnazija w Choćebuzu přewjedł. Přeprošeni běchu mnozy, kiž so hłownohamtscy abo čestnohamtscy na tutym polu angažuja: župne předsydstwo župy Dolna Łužyca, Zwjazkowe předsydstwo Domowiny, Serbska rada, Spěchowańske towaristwo za serbsku rěc w cerkwi, zamołwite za serbske naležnosće, Serbske šulske towarstwo, Maśica Serbska, wšě serbske institucije a redakcije w Delnjej Łužicy kaž tež Institut za sorabistiku z Lipska. Wjace hač 40 ludźi je so na zarjadowanju wobdźěliło.Zawod podaštaj nawoda RCW w Choćebuzu dr. Viktor Zakar, kiž předstaji wuzwolene rezultaty ewaluacije delnjoserbskich zakładnošulskich poskitkow, a wjednica RCW dr. Beata Brězanowa, kiž porěča wo wuknjenskim procesu a wowliwowacych faktorach z pedagogiskeho wida.Potom rozdźělichu so přitomni do pjeć diskusijnych kołow, zo bychu jednotliwe aspekty intensiwnje rozjimali. To běchu:

1. Ewaluacija jako šansa!? Što trjebamy za efektiwne posrědkowanje a přiswojenje delnjoserbskeje rěče wot pěstowarnje hač do 12.lětnika?
2. Kotre instrumenty a móžnosće maja serbske institucije za zaručenje kwality serbskeje wučby? Kotre dodatne rěčne rumy móža wone zwonka šule wutworić? Kotre resursy steja za to k dispoziciji a kotre dalše su trěbne?
3. Što trjebamy za šěršu akceptancu serbskeje rěče w towaršnosći? Kak móhli so starši jako multiplikatorojo zdobyć?
4. Kak hodźi so zaručić, zo šulerjo po 10. lětniku resp po abiturje serbsku rěč na přiměrjenym niwowje wobknježa?
   a) Što móže serbska towaršnosć k tomu přinošować?
   b) Kotre ramikowe wuměnjeja a spěchowanja trjebamy za to ze stron statnych instancow?
5. Na zakładźe kotrych naprawow móhło powołanske dźěło w serbskich wobłukach za dorost atraktiwne być?

Přizamkny so předstajenje wuslědkow diskusijnych kołow. Při tym mjenowachu so wšelke aspekty rěčneje politiki Serbow. Přitomni běchu sebi přezjedni, zo trjeba rěč wotpowědne wuměnjenja, zo by dale wobstała. Zo ma wona dale wobstać, bě konsens. Rěčny staw we Łužicy pak je jara rozdźělny. Saha wot nałožowanja serbšćiny na maćernorěčnym stawje w serbskich swójbach hač k dźělnym nałožowanju serbskeje rěče při nałožkach a hajenju kultury. Za tute wšelake stawy rěčnych kmanosćow je trěbne rěčne planowanje, kotrež wšelke wuměnjenja wobkedźbuje a rěč spěchuje.Za wobjednanje wuslědkow ewaluacije chcedźa přitomni dalše zetkanje přewjesć.