Ze spominanjom na wotbagrowane serbske wjeski z widom na zakónčenje zmilinjenja brunicy zahaji so pjatk wječor w Rownom zjawny dźěl posedźenja Zwjazkoweho předsydstwa Domowiny. Předsyda Domowiny Dawid Statnik mjez druhim praji: “Kónc wotbagrowanja wsow je wotwidźeć. Z tym spjelni so pomału žadanje našeho programa ‘Domowina 2025’ wo dołhodobny a rjadowany wustup z wudobywanja a zmilinjenja brunicy a dale statny spěchowanski program za strukturnu změnu we Łužicy.” Wot lěta 1998 hač do 2014 je Domowina 17 wopomnjenskich dnjow za wotbagrowane serbske wsy jako zjawne zarjadowanja organizowała. Dalše tajke zarjadowanja so jenož tam přewjedu, hdźež potrjecheni resp. jich potomnicy dotal žane wopomnišćo nimaja. Přitomni wobzamknychu namjet za jednanski porjad 19. hłowneje zhromadźizny Domowiny, kiž wotměje so dnja 30.03.2019 w Chrósćicach. Delegaća ze wšěch župow a towarstwow změja tam bilancować dźěławosć Domowiny w prěnjej połojcy wólbneje doby 2017-2021 a schwalić předźěłane dźěłowe směrnicy Domowiny za dobu hač do 20. (wólbneje) hłowneje zhromadźizny w lěće 2021. Zwjazkowe předsydstwo powoła zastupjerjow Domowiny za poradźowace sobudźěło w šulskich konferencach serbskich šulow a šulow ze serbskorěčnym poskitkom w Sakskej. Kubłanski wuběrk zwjazkoweho předsydstwa ma wuměnu nazhonjenjow a zhromadne dźěło zastupjerjow Domowiny w šulskich konferencach koordinować. Čłonojo zwjazkoweho předsydstwa přihłosowachu naćiskej hospodarskeho plana za lěto 2019. Zarjad dósta nadawk, trěbne hospodarske jednanja ze Załožbu za serbski lud přewjesć. Wjacori čłonojo Zwjazkoweho předsydstwa Domowiny podachu wobšěrne informacije wo swojim skutkowanju: Předsydka Sakskeje rady za serbske naležnosće Marja Michałkowa poda rozprawu wo dźěławosći rady za lěće 2016 a 2017. Přitomni wzachu rozprawu na wědomje a wuprajichu jeje čłonam dźak a připóznaće za jich zamołwite čestnohamtske skutkowanje.Manfred Hermaš, župan župy Jakub Lorenc-Zalěski z. t., předstaji aktualne aspekty dźěławosće župy. Wón podšmórny, zo koncentruje so župa w swojej dźěławosći pod změnjenymi wuměnjenjemi na spěchowanje rěčnych projektow, wosebje zachowanja slepjanšćiny.Wuhódnoćejo lětuši kongres Federalistiskeje unije europskich narodnosćow (FUEN) praji wiceprezident FUEN Bjarnat Cyž mjez druhim, zo budu nas temy iniciatiwy Minority SafePack, kotruž je tež wjele Serbow podpisało, tež dale zaběrać, nic naposledk w konteksće klětušich wólbow do Europskeho parlamenta. Klětuši kongres FUEN wotměje so na Ukrainje, a to tohorunja jako wólbna zhromadźizna. Na namjet Jana Nuka diskutowachu čłonojo Zwjazkoweho předsydstwa Domowiny wo kubłanskich prašenjach, wosebje wo dalewuwiwanju WITAJ-prócowanjow. Přitomni namjetowachu wutworjenje skupiny, kiž ma analyzować dotalne iniciatiwy na polu kubłanja k zdźerženju a dalewuwiću serbskeje rěče w pěstowarnjach a šulach. Wjacori čłonojo zwjazkoweho předsydstwa wuprajichu so zwólniwi, w tutej skupinje sobudźěłać.