Hladajo na přihot přichodneho financneho zrěčenja Załožby za serbski lud wot 2026 zeńdźechu so dźensa zastupjerjo serbskich institucijow, zo bychu so wo tuchwilnym połoženju serbskich institucijow wuměnili. Zastupjerjo dohromady wosom serbskich institucijow předstajichu swoju tuchwilnu situaciju kaž tež priority po lěće 2026. Na posedźenju wobdźělichu so nimo prezidija Domowiny tež serbscy załožbowi radźićeljo. Běše to zazběh za dalše zhromadne wuradźowanja, na kotryž bě předsyda Domowiny Dawid Statnik přeprosył.

Na swojim dźensnišim 24. rjadnym posedźenju zaběraše so prezidij Zwjazkoweho předsydstwa Domowiny z přihotom poradźowaceho wuběrka za prašenja serbskeho ludu poboku Zwjazkoweho ministerstwa nutřkowneho a za domiznu, kotryž schadźuje so 20.09.23 w Berlinje.

Dalša tema běše přichodne posedźenje zwjazkoweho předsydstwa, kotrež budźe 22.09.23 w Trjebinje. Ćežišća tutoho budu mj. dr. 

• informacija Marka Sucheho, předsydy Serbskeje rady Sakskeje wo dotalnej dźěławosći we wólbnej dobje 2019-2024, a
• wólby 4. serbskeho naměstnika ze Sakskeje do Rady Załožby za serbski lud.

    Nimo toho wobzamkny prezidij delegaciju štyrjoch zastupjerjow młodźinskeho towarstwa Pawk na nazymski seminar Mjeńšiny europskich narodnych skupin (MENS) do Suboticy w Serbiskej wot 16.-22.10.23.