Nowa zběrka z tuchwilu wjac hač 90 serbskimi poskitkami za šule po cyłej Łužicy je nětko wušła. Kubłanska referentka Domowiny, Katrin Suchec-Dźisławkowa, je lisćinu w kooperaciji z regionalnymi rěčnicami Domowiny zestajiła a wjednistwam wšěch šulow, na kotrychž serbšćinu wuwučuja, připósłała. Lisćina je wot dźensnišeho tule na internetnej stronje třěšneho zwjazka přistupna.

Na lisćinje namakaja zajimowani wučerjo wopisanje poskitka, zdobom woni zhonja, hač so poskitk za pućowanske resp. projektne dny hodźi abo za zarjadowanje w šuli. W 15 špaltach je dosć informacijow wo poskitkach z cyłeje Łužicy a samo z Berlina, Prahi, Wrocława a wo cilowej skupinje hladajo na starobu a rěčne znajomosće. Lisćina njeje doskónčna a so stajnje dale wuwiwa.

Katrin Suchec-Dźisławkowa je w lisće šulam pisała: „Smy poskitki zhromadźili, zo byšće na jednore wašnje přehlad wo šěrokosći poskitkow dóstali a lochce prawy kontakt abo wažne informacije nadešli. Zběrka njeje dospołna. Aktualnje rozmyslujemy wo jeje wobjimje a doskónčnej formje. Prosymy Was, zběrku Wašim kolegam spřistupnić a wo njej informować. Wjeselimy so nad aktiwnym wužiwanjom zběrki a poskitkow. Rady Waše přispomnjenja k zběrce přiwzamy a so wo přesadźenje prócujemy.”