Statnu sekretarku za wědomosć slědźenje a kulturu Braniborskeje dr. Ulrike Gutheil wopytaštaj dnja 19.03.2019 předsyda Domowiny Dawid Statnik a zastupowacy jednaćel Marcus Końcaŕ. Dr. Gutheil je zamołwita krajneho knježerstwa za naležnosće Serbow.Přitomni rozmołwjachu so mjez druhim wo WITAJ-ewaluaciji, přichodnym finančnym zrěčenju Załožby za serbski lud a strukturnej změnje. Tak zwurazni Statnik mjez druhim, zo njeměli so serbske tematiki w politiskim jednanju na kulturny wobłuk wobmjezować, ale zo su Serbja w zmysle strukturneje změny tež potrjecheni w hospodarskich a infrastrukturnych wobsahach. Nastupajo WITAJ-ewaluacije pokazaštej zastupjerjej Domowiny mjez druhim na planowanu klawsuru dnja 10.04.2019. W jeje ramiku chcedźa sebi serbske gremije poziciju k ewaluaciji a k dalšemu postupowanju na polu serbskeho šulstwa nadźěłać. Za přichodnu financnu dobu wobhladuje Statnik spěchowanje rěče a dalše regionalizowanje poskitkow jako bytostne. Tu widźi potrjebu zapřijeća dalšich nadawkow do spěchowanja. Wšo druhe, tak předsyda Domowiny, by dotalne struktury w swojim skutkowanju hewak dale poćežowało.Na rozmołwje wobdźělił je so tež Měto Nowak, referent krajneje zamołwiteje za naležnosće Serbow.Foto: Měto Nowak, Dawid Statnik, dr. Ulrike Gutheil a Marcus Końcaŕ (wotlěwa) zetkachu so dnja 19.03.2019 w ministerstwje za wědomosć, slědźenje a kulturu w Podstupimje na rozmołwu. Foto: ministerstwo