Tutón kónc tydźenja budźe so ciwilna towaršnosć wospjet zjednoćić, zo by přećiwo prawicarskemu ekstremizmej a čłowjeskej njepřećelskosći demonstrowała.

W Budyšinje iniciěruje syć za demokratiju a mnohotnosć „tvBUNT”, w kotrejž je tež Domowina čłon, sobotu, 27.01.24 w 14 hodź. na Hłownych wikach demonstraciju.

We Wojerecach namołwja iniciatiwa “Ciwilna kuraža Wojerecy” ludnosć, njedźelu, 28.01.24 wot 15 hodź. na Łužiskim naměsće za demokratiju demonstrować.

Wobě demonstraciji stejitej pod hesłom “Zhromadnje přećiwo prawicarskemu ekstremizmej – Zhromadnje za čłowjeskosć a demokratiju”. Předsyda Domowiny Dawid Statnik so w Budyšinje kaž tež we Wojerecach z narěču wobdźěli.

Pozadk demonstracijow

Demonstracije su reakcija na wotkryće skupiny “Correctiv”. Woni rozprawjachu wo zetkanju prawicarskich ekstremistow, na kotrymž so tež AfD-politikarjo/ki wobdźělichu. Na tutym sej wobdźěleni “politiske a etniske wurjedźenje w Němskej” žadachu. Iniciatiwje w Budyšinje a Wojerecach zasudźitej tute nječłowjeske pozicije. Mjenowanej demonstraciji stej dźěl cyłozwjazkoweje protestneje žołmy přećiwo prawicarskemu ekstremizmej a AfD.