Za kubłansku jězbu, kiž powjedźe po slědach Korle Awgusta Kocora do Zahorja, Ketlic a do Stróže sobotu, 24. septembra, móža so zajimcy wotnětka hač do 16.9. w regionalnym běrowje w Budyšinje přizjewić. To zdźěli regionalna rěčnica Katja Liznarjec po posedźenju župneho předsydstwa župy „Jan Arnošt Smoler” štwórtk, 1.9., w Budyšinje. W Ketlicach so wodźenje po cyrkwi wotměje, pišćele budu zaklinčeć a dr. Christian Kessner, awtor knihi „Swjate su mi twoje hona", budźe zajimcam přednošować.

Za nowember přihotuja čłonojo župneho předsydstwa serbski filmowy dźeń w Budyskim měšćanskim kinje. Dopołdnja chcedźa serbske trikowe filmy za dźěći a šulerjow pokazać, popołdnju filmy za cyłu swójbu a wječor serbske filmy za dorosćenych. Budu to paski z časa DEFA runje tak kaž z filmoweho studija Sorabije pod nawodom dr. Tonija Bruka. Zajimcy móža so hižo nětko na wosebite filmowe chłóšćenki wjeselić.

Dale wuhódnoćichu čłonojo gremija dotalne projekty kaž swjedźeń za swójby na zahrodźe Serbskeho ludoweho ansambla lětsa w juliju. Zarjadowanje su swójby z Budyšina a wokoliny jara derje přiwzali. Tež lěćny swjedźeń w Přiwćicach w Malešanskej kónčinje bě ze serbskim programom jara wuspěšny. Tule skutkuje Lucian Kaulfürst jako motiwator za tworjenje rěčnych rumow.