Župa „Handrij Zejler” chce kandidatam za wólby wyšeho měšćanosty Wojerec 6. septembra sčasom zjawne prašenja k serbskim naležnosćam sposrědkować. Čas zapodaća kandidaturow so 2.7. skónči, a 22.7. chcedźa čłonojo župneho předsydstwa najebać prózdniny serbske wólbne kopolaki wobzamknyć. Tak su so woni srjedu wječor na wuradźowanju gremija w bróžni domu Domowiny we Wojerecach dorozumili. Woni su na wědomje brali, zo je město wšě swjedźenja we wobłuku lětušeho bulwarda stare město koronakrizy dla wotprajilo, a tohodla njeje porno dotalnemu wotpohladej župy móžno, serbske wiki w małym ramiku na torhošću přewjesć. Nimo toho su skupiny zadźěwane byli, dosć hromadźe za wustup zwučować móc. Program za popołdnjo swójbow w Čornochołmčanskim Krabatowym młynje 7. nowembra bu pak wčera wobkrućeny.Župne předsydstwo je praktiske zwoprawdźenje wuspěšneju projektow župy w sakskim wubědźowanju „Čiń sobu” rozjimało. Regionalna rěčnica Sonja Hrjehorjowa je mjezystaw „žiweje kuzłarskeje křinje serbskich bajkow, bajow a powědančkow” předstajiła. Zaměr projekta je, po přikładźe dźiwadła Kamishibaj z wobrazami na blidźe powěsće a jich figury kaž hadźacy kral, Pumpot, lutki, zmij atd. předstajić. Wobrazy a dwurěčne werzije tekstow so we wosebitych projektach z dźěćimi a młodostnymi nadźěłaja a so w kooperaciji ze serbskimi wuměłcami zhotowjeja.Druhi wuspěšny projekt rěka „Serbska kulturna a zetkawanska bróžeń – Domowinski dom Wojerecy”. Tule dźe wo to, tute městno na zahrodźe domu „k rěčnej hwězdźe města Wojerec” wuwiwać. Z tym na „Rěčnu swětłownju” nawjazuja, dźěłarničku Gabriele Linakoweje, rěčnicy župneho předsydstwa, w kotrejž so serbsce wuknjacy zetkawaja, zo bychu so w serbšćinje dale wukmanjeli. z přećelnym postrowom / z pśijaznym póstrowom / Mit freundlichen GrüßenMarcel Brauman / Marcel Braumannnowinski rěčnik / casnikaŕski powědaŕ / Pressesprecher
wosobinski referent předsydy / wósobinski referent pśedsedarja / pers. Referent des VorsitzendenDomowina z. t. / Domowina – Bund Lausitzer Sorben e. V.Póstowe naměsto 2/Postplatz 2, 02625 Budyšin/Bautzentel. +49 3591 550-202 & +171 89 83 985presse@domowina.demarcel.brauman@domowina.dewww.domowina.de