Zwjazkowe předsydstwo Domowiny (ZP) je so pjatk wječor znowa přewažnje digitalnje schadźowało, dwě třećinje přitomnych čłonow gremijow stej so doma před ličakom na zarjadowanju wobdźěliłoj. Dalši zajimcy su přez livestream sćěhowali. Kak dale z Minority SafePack po negatiwnym rozsudźe Europskeje komisije?Předsyda třěšneho zwjazka Serbow, Dawid Statnik, informowaše, zo su FUEN, Domowina a dalše organizacije rozsud Europskeje komisije raznje kritizowali, žane konkretne konkluzije z europskeje wobydlerskeje iniciatiwy Minority SafePack (MSPI) njećahnyć. Zwjazkowe předsydstwo ma za trěbne, kaž je tež Katrin Suchec-Dźisławkowa zwurazniła, so dale za runoprawnosć europskich kulturow a rěčow a wotpowědne namjety MSPI zasadźować. W tutym zmysle chce so předsyda z partnerami na krajnej, zwjazkowej a europskej runinje wo přichodnych kročelach wothłosować a so z nimi dale zasadźować. Při tym ma so tež pozicija europskeho parlamenta napřećo komisiji skrućeć, wšako su so tři štwórćiny zapósłancow za zwoprawdźenje wobsaha MSPI wuprajili. Statnik dopomina na wuprajenje prezidentki europskeje komisije, Ursule von der Leyen, w jeje lońšej narěči wo połoženju EU: „Man selbst zu sein, ist nämlich keine Frage der Ideologie. Es ist eine Frage der Identität. Und die kann einem niemand nehmen” (Być swój njeje prašenje ideologije. Ale je prašenje identity, kotruž ći nichtó wzać njemóže). Statnik po dotalnej diskusiji: „To dyrbi tež za wšě narodne mjeńšiny w kóždym staće EU płaćić!”Hłowna zhromadźizna a dźěłowe směrnicy ZP wobkrući namjet prezidija, pandemije dla přestorčenu hłownu zhromadźizna sobotu, 12. junija 2021 přewjesć. Zarjad je nadawk dóstał, za so hodźacej městnosću pytać. Tomu je so wobjednanje naćiska dźěłowych směrnicow 2021-2023 přizamknyło, wo kotrychž ma hłowna zhromadźizna po dalšej diskusiji w towarstwach a župach rozsudźić. Nowej městnje w Domowinje za młodźinu a kubłansku politikuJednaćel Marko Kowar informowaše, zo budźe wot póndźele zaso městno za dźěło z młodźinu wobsadźene. Nowa kolegowka Virginia Hanuzowa (33) skutkuje na bazy srědkow młodźinskeje pomocy na teritoriju wokrjesow Budyšin a Zhorjelc. Jako „wulki wuspěch” hódnoćeše Dawid Statnik, zo móže Domowina nětko skónčnje za skrućenje kubłanskopolitiskeho dźěła třěšneho zwjazka městno referenta za kubłanje a młodźinu wupisać, wotpowědne srědki je Załožba za serbski lud něšto hodźin do posedźenja přizwoliła. Dźak za wuspěch w naćisku statneho zrěčenja MDRDalši wuspěch je naćisk noweho statneho zrěčenja MDR, po kotrymž maja Serbja w rozhłosowej radźe přichodnje zastupjeni być. W tutym zwisku so Dawid Statnik něhdyšemu dołholětnemu jednaćelej Bjarnatej Cyžej za jeho zaměrny angažement dźakowaše, a tež wšěm partneram w politice, kotřiž su Serbow podpěrowali. Domowina, kiž ma zastupjerja resp. zastupjerku serbskeho ludu postajić, namołwja zajimcow, so přizjewić. Efektiwnosć spěchowanja WITAJ-skupinow ma so přepruwowaćZP je ćežišća dźěławosće zarjada Domowiny a dźěłowy plan Rěčneho centruma WITAJ (RCW) wobzamknyło a rozprawje wobeju na wědomje brało. Nawodnica RCW, dr. Beata Brězanowa, móžeše wo tójšto projektach rozprawjeć. Dawid Statnik so w mjenje ZP za spomóžnu dźěławosć RCW dźakowaše. Jan Nuk je so wobhonił k Sakskemu rjadowanju k spěchowanju WITAJ-skupinow w pěstowarnjach. Tam je so w dotalnych diskusijach kritizowało, zo njeje so dotal pruwowało, hač so srědki efektiwnje zasadźuja. Předsydźe Domowiny přepoda so nadawk, w tutej naležnosći so wobroćić na młodźinski hamt wokrjesa Budyšin, kotruž tute srědki wobhospodarja. Wo wuslědkach ma Zwjazkowemu předsydstwu rozprawjeć. Kak dadźa so serbske zajimy najlěpje zastupować? Zašły tydźeń je so we wšelakich medijach tak mjenowany naćisk „statneho zrěčenja” ze stron zjednoćenstwa „Serbski sejm” předstajił. Na naprašowanje w ZP k tomu wotmołwiwši wupraja so předsyda Domowina: „Smy jim před nimale poł lětom poskićili, w serbskej ciwilnej towaršnosći třěšneho zwjazka Łužiskich Serbow wo jich idejach wotewrjenje diskutować. Tón poskitk dale wobsteji – najebać to, zo njeje ,Serbski sejm’ hač do dźensnišeho ani wo přistupje zhromadnosći Serbow w Domowinje oficielnje rozsudźił ani nam někajku wotmołwu sposrědkował njeje. Jako předsyda Domowiny sym wězo aktualne wozjewjenja na wědomje brał. Wosobinsce nimam tajke wustupowanje w zjawnosći serbskemu ludu za spomóžne, kotrež proklamuje: Mamy prawo na swójski teritorij, kotrehož so wzdamy, jeli nam njekontrolowane prawo na wudawanje dawkowych pjenjez, swójske serbske sudnistwo a wotškódnjenje za tysach lět njeprawdy dawaće. Tež njemóže łža, zo su w Załožbje za serbski lud Serbja potłóčeni, zakład našeje politiki być: Direktor załožby je Serb a we wobsahowych prašenjach maja zastupjerjo Serbow w załožbowej radźe prawidłownje poslednje słowo. Wo reformach strukturow móhli drje debatować, ale prošu na zakładźe faktow. Wostanjemy wotewrjeni za dialog a kročimy dale na puću realizma. Tak smy hromadźe z partnerami docpěli, zo budźe serbski lud přichodnje tež w rozhłosowej radźe MDR zastupjeny, zo je serbski lud w zwjazkowym zakonju wo zesylnjenju strukturow dotalnych brunicowych rewěrow wuraznje wobkedźbowany a zo změje prawdźepodobnje Załožba za serbski lud bórze štwórćinu wjac srědkow za wožiwjenje rěčnych rumow a spěchowanje serbskeje kultury k dispoziciji.”