Wot septembra změja tež Delni Serbja swoju „sotru“ za awtomatiske přełožowanje swojeje maćeršćiny do hornjoserbšćiny a němčiny. Bernd Melcher, nawoda wotnožki Rěčneho centruma Witaj Domowiny w Choćebuzu, je pjatk, 20.5., na „hybridnym” posedźenju zwjazkoweho předsydstwa Domowiny na žurli Serbskeho domu w Budyšinje a online z digitalnym přistupom připowědźił, zo budźe internetna přełožowanska mašina https://sotra.app/ za běrtlk lěta nałožowanje wobeju serbšćinow runohódnje ze wšěmi funkcijemi posłužować. Najebać to, zo njemóže digitalny přełožk lektoralne přełožowanje narunać, widźi předsyda Domowiny, Dawid Statnik, w tym sylnu podpěru za tworjenje nowych rěčnych rumow delnjoserbšćiny tež we wšědnej dźěławosći třěšneho zwjazka.

Předsyda Domowiny, Dawid Statnik, rozjimaše naćisk prawnisce trěbnych změnow wustawkow, z kotrymiž dyrbjała wurjadna hłowna zhromadźizna 3. smažnika/junija w Choćebuzu pokiwam Drježdźanskeho zarjadniskeho sudnistwa wotpowědować, zo bychu na lońšej hłownej zhromadźiznje wobzamknjene nowe wustawki płaćiwosć nabyli. Nimo toho chcedźa pokiw Křesćana Krawca w Serbskich Nowinach wobkedźbować, zo ma zwjazkowe předsydstwo dale rozprawu wo połoženju serbskeho ludu na hłownej zhromadźiznje zapodać. Na namjet župy Delnjeje Łužicy ma so zwjazowace postajić, zo dyrbi pak hłowny jednaćel pak jednaćel w Choćebuzu swój běrow měć:

https://www.domowina.de/fileadmin/Assets/Domowina/Material_Domowina_Bundesvorstand/Material_Hauptversammlungen/Material_21HZ2022/2.4._nacisk_za_zmenu_wustawkow_Domowiny.pdfhttps://www.domowina.de/fileadmin/Assets/Domowina/Material_Domowina_Bundesvorstand/Material_Hauptversammlungen/Material_21HZ2022/1.4._nacerjenje_za_zmenu_wustawkow.pdf 

Kulturny referent Domowiny Clemens Škoda předstaji doporučenja kulturneho wuběrka załožbowej radźe, při twarskej koncepciji Serbskeho foruma wědy na Lawskim arealu zajimy serbskeje ciwilneje towaršnosće, na přikład wjesnych muzejow zapřijeć. Bjarnat Cyž a Jan Bělk staj w diskusiji na wulke wužadanja cyłeho wulkoprojekta skedźbniłoj, kotrež maja so hišće zmištrować. Zwjazkowe předsydstwo přiwza wosomstronsku papjeru z wulkej wjetšinu. (Wšě předłohi tutoho a dalšich wobzamknjenjow aktualneho zjawneho posedźenja namakaće tu:

https://www.domowina.de/fileadmin/Assets/Domowina/Material_Domowina_Bundesvorstand/Beschlussvorlagen/ZP2022_05_20_predlohi_Beschlussvorlagen.pdf.)

Z wjeselom su signale z etatoweho wuběrka zwjazkoweho sejma na wědomje brali, zo su wobmjezowanja hospodarjenja najskerje wot 1. julija z blida. W tutym zwisku wjeseli so předsyda Domowiny tež nad zwyšenjom srědkow Danam a Frizam. Dalši rjany lěćny termin: Lětni swjedźeń čłonow zwjazkoweho předsydstwa budźe 8. julija – pola Marka Kowarja, něhdyšeho jednaćela Domowiny, kiž chce z čłonami gremija swój zastup do wuměnka woswjećić. Na kóncu posedźenja je předsyda Domowiny w mjenje zwjazkoweho předsydstwa dotalnemu předsydźe Towarstwa Cyrila a Metoda (TCM), Jurjej Špitankej, za dołholětny angažement a spomóžne zhromadne dźěło z třěšnym zwjazkom dźakował. Marja Michałkowa je na radźenu změnu generacijow na čole TCM skedźbniła, kotrehož nowy předsyda je Cyril Hančik.

Posedźenje bu zaso tež přez livestream wusyłane a je dale na Youtube-kanalu Domowiny přistupne.

Wobraz „hybridneho” wuradźowanja na žurli Serbskeho domu w Budyšinje a online z digitalnym přistupom. Foto: Clemens Škoda.