19. hłowna zhromadźizna Domowiny wotměje so 30. měrca 2019 w Chrósćicach. To wobzamkny Zwjazkowe předsydstwo Domowiny na swojim posedźenju pjatk, 27. apryla w Budyšinje. Delegaća změja bilancować prěnju połojcu wólbneje doby 2017-2021, wotličić zwoprawdźenje dźěłowych směrnicow Domowiny a schwalić předźěłane dźěłowe směrnicyza dobu 2019-2021. Tohorunja je předwidźane, wustawki Domowiny we wubranych dypkach změnić. Zwjazkowe předsydstwo namołwja župy a specifiske sobustawske towarstwa Domowiny, jemu hač do kónca lěta 2018 dalše namjety k wobjednanju posrědkować.

Dźěłowe wuběrki zwjazkoweho předsydstwa dóstachu nadawk, hač do oktobra namjety za předźěłanje dźěłowych směrnicow Domowiny za dobu 2019-2021 zdźěłać.

Zwjazkowe předsydstwo wobzamkny stejišćo Domowiny ke krajnemu wuwićowemu planej Berlin/Braniborska: Domowina zapódajo stojnišćo k nacerjenju Krajnego wuwiśowego plana stolicowego regiona Barliń-Bramborska a pšosy wo wobglědowanje pśepódanych naraźenjow pśi pśeźěłanju nacerjenja.Stejišćo so w přichodnych dnjach zamołwitym připósćele.

Jednaćel Domowiny Marko Kowar bu jako zastupjer Domowiny z poradźowacym hłosom do wodźenskeho wuběrka za projekt „Dźěłarnička přichoda Łužicy – wuwiće nowych perspektiwow we wobłuku krajej přesahowaceho regionalneho wuwića we Łužicy“ powołany.

Dale přijimowachu čłonojo rozprawu wo rezultatach zběranja podpismow za Minority Safepack. “Wjeselu so jara, zo smy hranicu 1 mil. podpismow překročili. Běše to napjate lěto połne akcijow a zarjadowanjow. Njejsmy pak to sami zdokonjeli. Mnozy su nam jara pomhali a za akciju wabili. Tež su so wšitke relewantne politiske kruhi z iniciatiwu zaběrali abo so za nju wuprajili. Hač je to Braniborski krajny sejm abo ministerski prezident w Sakskej. Smy byli jara prezentni. Njeměli wuspěch jenož po ličbach měrić ale tež po politiskej diskusiji”, tak Statnik po posedźenju.

Tež wobjednachu so pisomne informacije.

Čłon župneho předsydstwa Jurij Łušćanski a regionalna rěčnica Domowiny, Katja Liznarjowa rozprawještej wo dźěławosći Župy “Jan Arnošt Smoler”. Zwjazkowe předsydstwo Domowiny wupraješe župje dźak a připóznaće za skutkowanje.

Čłonaj mjeńšinoweje rady Němskeje Bjarnat Cyž a Dawid Statnik rozprawještej wo dźěławosći mjeńšinoweje rady a mjeńšinoweho sekretariata. Nimo njeju je tež Delnjoserb Kito Ela z čłonom w gremiju. Mjeńšinowy sekretariat nawjeduje Serbowka Judit Šołćina. Zwjazkowe předsydstwo Domowiny wupraji mjeńšinowej radźe a mjeńšinowemu sekretariatej dźak a připóznaće za zamołwite skutkowanje w zajimje awtochtonych narodnych mjeńšinow Němskeje.