Domowina přewjedźe naprašowanje čłonow serbskich towarstwow a zwjazkow. To wobzamkny zwjazkowe předsydstwo Domowiny na swojim posedźenju pjatk, 31. awgusta w Narću. "Chcemy tak zhonić, što je Serbam wažne a wosebje, kak skutkowanje třěšneho zwjazka posudźuja”, tak Statnik po posedźenju. Naprašowanje z 25 prašenjemi njeměri so jeničce na čłonske cyłki Domowiny, ale je wšitkim wotewrjene, kotřiž chcedźa so na naprašowanju wobdźělić. Nimo třirěčnych formularow w papjerjanej formje budźe tež móžno, naprašnik digitalnje přez web-stronu wupjelnić. Eksterna firma z Lipska wuslědki zjima a zwjazkowemu předsydstwu předstaji. Wuchadźišćo naprašnika je nadawk dźěłowych směrnicow, nutřkownu a wonkownu komunikaciju třěšneho zwjazka polěpšić.
Dale wobzamkny Zwjazkowe předsydstwo Domowiny namołwu k zapodaću namjetow za wólby serbskich zastupjerjow ze Sakskej do załožboweje rady na dobu 2019-2023.
Tuchwilna wólbna doba rady Załožby za serbski lud skónči so w měrcu přichodneho lěta. Po wustawkach Załožby za serbski lud § 5 wotstawk 2 dypk 1 přisłušeja załožbowej radźe šěsć zastupjerjow serbskeho ludu, z toho štyrjo ze Swobodneho stata Sakska a dwaj z kraja Braniborska. Kóždy z nich ma měć naměstnika. W Sakskej wola so zastupjerjo gremija přez Zwjazkowe předsydstwo Domowiny.
Zwjazkowe předsydstwo Domowiny namołwi k zapodaću kandidatnych namjetow za wuzwolenje serbskich zastupjerjow ze Sakskeje do załožboweje rady hač do 1. nowembra 2018. Namołwa so předewšěm wusměri na serbske zjednoćenstwa w Sakskej. Namjet z wotpowědnym wopodstatnjenjom a z wupjelnjenym naprašnikom kandidatki/kandidata maja so zapodać na zarjad Domowiny, Póstowe naměsto 2, 02625 Budyšin.
Kandidaća měli slědowace wuměnjenja spjelnić: wólbokmanosć po wólbnym zakonju Sakskeje; wuznaće k přisłušnosći serbskemu ludej; wobknježenje serbskeje rěce (ertnje a pisomnje); wosobinski angažement za serbski lud; zwólniwosć k čestnohamtskemu dźěłu jako čłonka/čłon załožboweje rady a k přewzaću cyłoserbskeje zamołwitosće při rozsudach wo prioritach přichodneho spěchowanja serbskich projektow a institucijow.

Předsyda wuběrka za hospodarske naležnosće, Marko Kliman a jednaćel Domowiny Marko Kowar informowaštej dale wo aktualnym stawje přihotow konferency k strukturnemu wuwiću we Łužicy. "Sydlenski teritorij Serbow w Braniborskej a Sakskej be w zašłosći direktnje wot wudobywanja a zmilinjenja brunicy potrjecheny. Samsne potrjechi za strukturne wužadanja w zwisku z předwidźanym wustupom ze zmilinjenja wuhla z klimapolitiskich přičin. Serbski lud jako cyłk móže so jenož w starodawnym sydlenskim teritoriju wobchować a dale wuwić. Za to je perspektiwa za młodych swójbow we Łužicy tež do přichoda trěbna. Z toho wurosće potrjeba, zo so Serbja w debaće k přichodej Łužicy po brunicy wosebje angažuja a z wida Serbow swoje wočakowanja na wuwićowy koncept Łužicy we wothłosowanju z politiskimi gremijemi wšěch runin, z regionalnymi a komunalnymi partnerami wudźěłaja", tak Kowar. Dwudnjowsku konferencu na uniwersiće BTU w Złym Komorowje přewjedźe Domowina - Zwjazk Łužiskich Serbow z. t. hromadźe z Dźěłarničku přichoda Łužicy dnja 13./14.09.2018. Zajimcy su wutrobnje přeprošeni a měli so po móžnosći dočasnje přizjewić. Tež móžnosće transporta so tučasnje pruwuja.Dalše informacije a časowy wotběh namakaće pod https://www.domowina.de/hsb/konferenca/