Maš lóšt, přichod Serbow sobu wuhotować? Chceš w zajimawych dźěłowych wuběrkach sobu skutkować a ideje nastorčić? Sy wćipna/y na to, rozprawy přepruwować a wažne rozsudy tworić?

Domowina přewjedźe 05. apryla 2025 w Serbskim ludowym ansamblu w Budyšinje swoju 23. hłownu zhromadźiznu. Tuta je zdobom wólbna zhromadźizna, a wažne funkcije w Domowinje so na dobu 2025-2029 znowa wola. Prosymy tuž wšitke župy a čłonske towarstwa wo zaměrne wabjenje kandidatkow a kandidatow za nowowólby organow Domowiny na wólbnu dobu 2025-2029.

Wolić maja so předsyda abo předsydka a wotpowědny zastup. Dale wola so čłonki a čłonojo zwjazkoweho předsydstwa, rewizijneho kaž tež změrcowskeho wuběrka.

Někotre wuměnjenja dyrbja kandidatki a kandidaća za wólby spjelnić: Kóžda kandidatka a kóždy kandidat je čłonk/a Domowiny a trjeba pisomnu podpěru jedneje župy abo jednoho čłonskeho towarstwa Domowiny^[1]. Dalše wuměnjenje je, zo su wuzwoleni zwólniwi, wólby přiwzać a wotpowědnu funkciju zamołwiće za třěšny zwjazk a w zhromadnym dźěle ze župami a towarstwamištyri lěta aktiwnje wukonjeć. K tomu słuša na přikład, zo w jednym fachowym wuběrku sobu skutkuja a tak sobu namjety za wobzamknjenja zwjazkoweho předsydstwa nadźěłaja. Zwjazkowe předsydstwo wuradźuje štyri do šěsć razow wob lěto a to pućujo po cyłej Łužicy.

Namjet zapodajće prošu z podpisanym formularom hač do 31.01.2025 zarjadej Domowiny z póštu na Póstowe naměsto 2, 02625 Budyšin abo z e-mailku na sekretariat@domowina.de.

Připódla: Jězbne wudawki za čestnohamtske dźěło so zarunaja a płaći so posedźenski pjenjez. Zarunanje předsydy abo předsydki zmóžni cyłodnjowsku dźěławosć. Městopředsydce abo městopředsydźe Domowiny dóstanjetej/aj za swoje čestnohamtske dźěło na čole třěšneho zwjazka zarunanje wudawkow.

Angažuj so nětko a kandiduj za wólbne funkcije Domowiny na dobu 2025-2029!

________

^[1] Třěcha Domowiny wobsteji z pjeć župow a 13 čłonskich towarstwow. Kotre to su, steji na našej webstronje.

[1] Třěcha Domowiny wobsteji z pjeć župow a 13 čłonskich towarstwow. Kotre to su, steji na našej webstronje.