Šěsć tydźenjow lěćnych prózdninow móža dołhe być a něchtóžkuli njewě tak prawje, što z časom započinać. Zmysłapołna zaběra za młodostnych je prózdninske dźěło. Tak mysleštaj tež 15-lětny šuler Serbskeho gymnazija Budyšin a 17-lětna absolwentka Serbskeje wyšeje šule Ralbicy a powabištaj so wo prózdninske dźěło w zarjedźe Domowiny a pola nas w Rěčnym centrumje WITAJ.

Jeju nadawki wopřijachu digitalizowanje zarjadniskich podłožkow, přełoženje naprašnika k temje “kapsny pjenjez” z němčiny do serbšćiny a jeho dalewuwiće kaž tež sobudźěło na přełožowanskim programje sotra. Za naš onlinowy přełožowar zascannowaštaj staršu serbsku knihu a zhotowištaj ze scanna word-dataju, kotraž so potom z wobdźěłanym mašinelnym přełožkom přełožowanskemu programej přida. Nimo toho wupruwowaštej sotru.app, zo byštaj zwěsćiłoj, kotre słowa program hišće njeznaje. 

A kak posudźujetaj wonaj swoje dźěło tu? Měnitaj “Domowina a Rěčny centrum WITAJ poskićitaj wšelakore nadawki. Njetrjebaš cyły čas samsne nadawki spjelnić, ale maš tróšku wotměny. Sy potajkim we wěstej měrje sam za to zamołwity, kak sej prózdninske dźěło wuhotuješ.”

Dohromady su šěsć pilnych pčołkow młodostnych w lětnym času pola Rěčneho centruma Witaj a zarjada Domowiny w Delnjej a Hornjej Łužicy dźěłali. Za to wuprajeja jim zamołwići wutrobny dźak. Štóž chce sej w přichodnych prózdninach něšto přizasłužić a serbske institucije podpěrać, je tu rady witany.

Foto: Domowina/Marija Šołćic: Jana Młodźinkec je w jeje prózdninskim času pola Domowiny w Budyšinje, kaž tež we Wojerecach mnohostronske dźěła wukonjała. Mjez druhim je wona zhromadnje z rěčnej motiwatorku z projekta ZARI Mariju Šołćic dwě wustajeńcy sobu wuhotowała. Jednu z tutych móža sej zajimcy sobotu na 2. lětnym swjedźenju w Přiwćicach wobhladać.