Marija-Tereza Krawžic, tučasnje kubłanska referentka za młodźinu w zarjedźe Domowiny, zestaja tuchwilu brošurku, kotraž ma młodym Serbam a Serbowkam wukubłanske powołanja pola serbskorěčnych předewzaćelow we Łužicy předstajić. Tuta ma wuńć w nalěću 2019.W brošurce maja młodostni, kotřiž su tuchwilnje we wukubłanju resp. kotřiž su před krótkim wukubłanje wotzamknyli, swoje rjemjesło předstajić. Dale chce młodostnym kontakty serbskich zawodow podać, pola kotrychž je móžno praktikum absolwować a/abo so wukubłać dać. Za to je na web-stronje Domowiny pod https://www.domowina.de/hsb/aktualnosce/brosurka-wukublanjow/ naprašnik składowany, kiž njech zajimowane předewzaća abo institucije prošu wupjelnja. Štóž ma zajim, zo so jeho předewzaće w tutej brošurce předstaji, njech prošu wupjelnjeny naprašnik kubłanskej referentce hač do 18.04.2019 z mejlku (mlodzina(at)domowina.de) abo jako faksom (03591 42408) pósćele. “Zaměr při tym je, zo dóstanu łužiske zawody wjac wukubłancow a wukubłančow. Z tym maja so serbskorěčne rjemjesło a institucije spěchować. Młodostni dóstanu hruby přehlad k móžnosćam wukubłanja tu we Łužicy. Přidatnje skići so Serbam, kotřiž su so w cuzbje wukubłali, přehlad, hdźe wobsteji móžnosć so powabić a so tak do domizny nawróćić”, tak Marija-Tereza Krawžic. Wona nadźija so, zo mnozy tutón poskitk wužija.