Na swojim dźensnišim posedźenju je prezidij zastupjerja Serbskeho młodźinskeho towarstwa Pawk na jutrowny seminar MENS pod hesłom “widźomnosć płaći / visibility matters” delegował. Tutón wotměje so wot 11. do 18.04.2025 w pólskim Opole. Seminar organizuje tamniši młodźinski zwjazk němskeje mjeńšiny.

Dalša doba “Partnerstwa za demokratiju”

Dale powoła prezidij Melanie Hajnkec jako zastupjerku Serbow do zwjazka “Partnerstwa za demokratiju” města Budyšin w dobje 2025 – 2029. Jako zastupowacu čłonku powoła gremij dźensa Judit Šołćinu.

Zaměry zwjazka su mjez druhim skrućenje towaršnostneho angažementa: spěchowanje demokratiskeje, tolerantneje a wšelakoreje zhromadnosće kaž tež prewencija radikalizacije a ekstremizma. 

Folklorny festiwal w Čěskej zastupjeny

Dale je prezidij Katharinu Jurkowu jako zastupjerku a Marka Kowarja jako zastupjerja Mjezynarodneho folklorneho festiwala “Łužica-Łužyca” na zetkanje CIOFF-sekcije “srjedźna a sewjerna Europa” do Strážnic (Čěška), kotrež budźe wot 22.-25.05.2025, delegował.

Inter(aktiwna) rozprawa na hłownej zhromadźiznje 05.04.2025 w SLA Budyšinje

Na lětušej hłownej zhromadźiznje budźe so rozprawa prěni raz interaktiwnje předstajić. Delegatki a delegaća kaž tež hosćo změja móžnosć so w běhu 45 mjeńšinow wo pjeć wjetšich temowych blokach dźěławosće Domowiny informować. Tež prezidij budźe zajimcam za prašenja k dispoziciji stać.

Dale je prezidij konstituowace posedźenje noweho woleneho zwjazkoweho předsydstwa přihotował. Tute wotměje so 11. apryla 2025 w Serbskim domje w Budyšinje. Hłowna tema budźe mjezsobne zeznaće čłonkow a čłonow zwjazkoweho předsydstwa, zeznaće zarjada kaž tež zakładow dźěławosće gremija.

Přichodne a poslednje posedźenje prezidija w aktualnej dobje budźe dźeń do hłowneje zhromadźizny, 04.04.2025 w Budyšinje.