Dźensa schadźowachu so čłonojo prezidija Domowiny – předsyda Dawid Statnik, městopředsydaj Hartmut Leipner a Marko Hančik, kaž tež Marlis Młynkowa – posledni raz w tutej wólbnej dobje.

Zhromadnje wuradźowachu wo poslednich přihotach 23. hłowneje a wólbneje zhromadźizny Domowiny, kotraž budźe jutře, 5. apryla wot 9:00 hodź. w Serbskim ludowym ansamblu w Budyšinje.

Cyłkownje su 111 delegatkow a delegatow nominowanych. Nimo tutych wobdźěli so Sakski ministerski prezident Michael Kretschmer a wita přitomnych. Tež zapósłanče a zapósłancy Zwjazkoweho sejma kaž tež Sakskeho krajneho sejma přijědu do Budyšina. Dale wita Budyski měšćanosta Karsten Vogt hosći.

Dnjowy porjad zeńdźenja najwyšeho organa třěšneho zwjazka je derje pjelnjeny. Nimo konstituowanja přewjedu so wólby předsydy, městopředsydy, zwjazkoweho předsydstwa, kaž tež rewizijneho a změrcowskeho wuběrka. Nowostka lětsa je wašnje předstajenja rozprawy 2023/2024.

Prěni raz změja přitomni móžnosć so na interaktiwne wašnje a we wšelakich rumach k temam Domowina jako politiske zastupnistwo, serbska rěč, projekty kaž tež dźěławosć Domowiny a wo wonkownym wustupowanju (corporate design) informować.

W swojich postrownych słowach hódnoći prezident Krajneho sejma Sakskeje Alexander Dierks angažement třěšneho zwjazka: „Hižo dlěje hač 100 lět wobsteji zjednoćenstwo, kotrež da kulturnym a politiskim zajimam serbskeho ludu słyšomny hłós. Za politiku w Sakskej je wona runje tak wažna, kaž tež spušćomna narěčenska partnerka.“

Tež dalše zapósłanče a zapósłancy hódnoća w postrownych słowach dźěło třěšneho zwjazka:

• Caren Lay, zapósłanča zwjazkoweho sejma, Lěwica  
• Kathrin Michel, zapósłanča zwjazkoweho sejma, SPD 
• Florian Oest, zapósłanc zwjazkoweho sejma, CDU 
• Elaine Jenčec, zapósłanča Sakskeho krajneho sejma, CDU 
• Ines Biebrach, zapósłanča Sakskeho krajneho sejma, BSW 
• Franziska Schubert, zapósłanča Sakskeho krajneho sejma, Zeleni 
• Laura Stellbrink a Gerald Eisenblätter, zapósłancaj Sakskeho krajneho sejma, SPD
• Udo Witschas, Krajny rada Budyskeho wokrjesa

Postrowne słowa su na našej webstronje wozjewjene.
Wšitke informacije wo 23. hłownej zhromadźiznje Domowiny a link na žiwe wusyłanje na našim YouTube-kanalu namakaće na našej webstronje.