Na minjenym kóncu tydźenja běše po 4 lětnej přestawce zaso Dźeń Saksow. W Aue-Bad Schlema wotewrješe pjatk we 18 hodź. prezident kuratorija a zdobom prezident krajneho sejma, Dr. Matthias Rößler wulkozarjadowanje. Nowy duch dnja Saksow je był wotmysł přihotowanskeho kuratorija, kotryž dźěłaše w zašłymaj lětomaj zhromadnje ze zarjadom statneje kenclije na modernej koncepciji a čerstwym sebjezrozumjeću jako najwjetši a mnohostronski swjedźeń towarstwow, zwjazkow, stronow a instituijow w Sakskej. Tež Serbja běchu ze Serbskej kulturnej informaciju, Serbskim kulturnym turizmom z.t. a Domowinu zastupjeni. W stejišću w “mily towarstwow” zahorichu so tójšto dźeći, ale tež njeličomni dalši hosćo na př. za serbski nałožk walkowanja abo za hraće computeroweje hry KRABAT. Při tym mějachu składnosć so wo Serbach wobhonić a wužiwachu rozmołwu ze sobudźěłaćerkomaj SKI, Reginu Matcynej a Jacqueline Bjeńšec. Wosebity poskitk běše workshop debjenja jutrownych jejkow, kotraž studentka Sophie Hejduškec poskićeše. Tež prezident Dnja Saksow, dr. Matthias Rößler wužiwaše składnosć a wopyta serbske stejišćo.  Njejapce dósta jako dopomnjenku serbske jutrowne jejko, kotraž je młoda studentka runje hotowe debiła.

Njedźelu wobdźěli so jako wjeršk Serbski folklorny ansambl Wudwor z.t. na přećahu a popołdnišim programje na jewišću towarstwow.

“Jako čłon prezidija Dnja Saksow sym zbožowny, zo Dźeń Saksow prosće zaso je. Nadźijam so, zo změje tutón wjeršk dale swojich podpěraćelow a wojowarjow, kaž dołholětneho, ale bórze so rozžohnowaceho prezidenta. Sym kruteho přeswědčenja, zo njeje Dźeń Saksow jenož swjedźeń pječenych kołbasow a šlagroweje hudźby, ale tež wosebje wulkotna platforma za ciwilnu towaršnosć w našim swobodnym staće. Facit napinaceho, ale rjaneho kónca tydźenja je, zo smy so jako jedyn dźěl pisaneje Sakskeje tu prezentowali. Wulki zajim za to serbske pokaza, zo su ludźo w našim zwjazkowym kraju jara wotewrjeni napřećo našej kulturje a rěči. Dyrbimy tuž tajke składnosće wužiwać, zo bychmy zajim budźili a wo nas informowali”, praji referent Domowiny, Clemens Škoda.

foto: SKI