Zhromadna zdźělenka medijam Domowiny a Južnoschleswigskeho wolerskeho zwjazka (SSW), 29.05.2024

Mjeńšina zetka mjeńšinu: We wobłuku informaciskeje jězby wopyta skupina krajneho sejma SSW tutón tydźeń (27.-30. meje) Łužiskich Serbow w Budyšinje. Zaměr je wuměna wo mjeńšinopolitiskich temach, kaž na přikład małe a wohrožene rěče zdźeržeć kaž tež mjeńšinowy škit w politisce njeměrnych časach přeco zaso zakitować.

„Jako narodne mjeńšiny móžemy wjele wot druheho wuknyć. Dyrbimy styki wutworić a so wuměnjeć, zo bychmy dobre ideje sobu domoj wzali a tam zwoprawdźili. Za to su tajke jězby njesměrnje drohotne“, praji Lars Harms, předsyda frakcije SSW.

Program wobsahuje wopyt Serbskeho muzeja, Serbskeho šulskeho towarstwa, třěšneho zwjazka Domowiny, studija MDR Budyšin, medijopedagogiskeho projekta LUCIJA, Serbskeho instituta, Rěčneho centruma WITAJ kaž tež Wopomnišća Budyšin.

Hladajo na zdźerženje rěče maja Serbja samsne wužadanja kaž Sewjerni Frizojo w Šleswigsko-Holsteinskej. Jako přikładne zarjadnišćo móžeše delegacija SSW we wobłuku jězby Rěčny centrum WITAJ zeznać. Tu wuwiwaja pedagogowki a pedagogojo serbski wučbny material, wudawaja časopisy a přewodźeja dwurěčne kubłanje na zakładźe wědomostnych dopóznaćow. Nimo toho pokazaja so wuspěchi kampanje „Sorbisch? Na klar.“ (www.sorbisch-na-klar.de) SMWK, w kotrejž so serbšćina ze šěrokej marketingowej akciju po wšěch kanalach prezentuje. „Z widźomnej dwurěčnosću wotewrjamy ludnosći woči a wuši. Tole přinošuje k tomu, zo je serbšćina samozrozumliwy dźěl Łužicy. To ma přistup k nawuknjenju rěče wolóžić.“, praji Dawid Statnik, předsyda Domowiny. Tež dwurěčnosć w měsće kaž tež wšědna prezenca serbskich wusyłanjow w zjawnoprawniskim rozhłosu MDR kaž tež RBB k tomu přinošujetej.

Wažna tema, za kotruž so SSW a Domowina zasadźujetej, je přiwzaće mjeńšinoweho škita do zakładneho zakonja. „Zakładny zakoń njeje za nas dospołny. Mjeńšiny trjebaja wosebity škit a za nas njeje přeco hišće zrozumliwe, čehodla njeměł tutón tež w zakładnym zakonju zapisany być“, tak Lars Harms.

Aktualne podawki z prawicarskoekstremnymi parolemi, wohroženjemi politikarkow a politikarjow w europskim wólbnym boju kaž tež do lětušich komunalnych a krajnych wólbow w Braniborskej a Sakskej, kóždežkuli nadpady na demokratiju SSW a Domowinu raznje zasudźujetaj. „Stejimy zhromadnje za žiwu mnohotnosć. Zasadźujemy so za měrliwe zhromadne žiwjenje wšelakich kulturow a rěčow, kajkež mjez mjeńšinu a wjetšinu kaž tež w hraničnych kónčinach wšědnje praktikujemy.“ Do wólbow apeluja wonaj swój hłós za demokratiski přichod wužiwać.

Tola při wšěm přećelstwje: Hdyž za něšto tydźenjow na EUROPEADŹE w němsko-danskej hraničnej kónčinje Serbske mustwo žonow přećiwo koparkam danskeje a friziskeje mjeńšiny hraje, je z harmoniju nimo. Ale jenož 90 mjeńšin dołho.