Prědny raz zmakaštej se krajny raźc wokrejsa Dubja-Błota Sven Herzberger a pśedsedaŕ Domowiny Dawid Statnik na źěłowem rozgrono, aby se wó aktualnych temach serbskego luda wuměnjałe.

W fokusu rozgrona su stojali pśedewšym žywa dwójorěcnosć, aktiwny nałog a móžnosć, kak móžo wokrejs wobej pódpěraś.

Krajny raźc Herzberger njepokazujo w rozgronje jano zajm na toś tych temach, ale jo pokazał teke na aktualne wuwiśa we wokrejsu. Tak jo se w zajźonych tyźenjach južo wó tom rozpšawiło, až jo se 80 busowych zastanišćow we wokrejsu dwójorěcnje wutoflowało. Statnik jo chwalił toś te póstupowanje: "Procowanja wó wuchowanje serbskeje rěcy njejsu jano nastupnosći serbskego luda. Teke komunalna familija jo wažny akter. Wokrejs pokazujo teke pśez źěło swójich zagronitych za Serbow, Sabrinu Kušcynu, kak mógało se to staś w dobrej zwězanosći.” Krajny raźc Herzberger jo naraźił, take zmakanje z Domowinu w pšawidłownych wótstawkach pśewjasć.

„Som fasciněrowany wó zgromadnem źěle a angažemenśe wjele akterow, kenž k tomu pśinosuju, serbsku rěc, kulturu a identitu zasej widobnjej a mócnjej w našej towarišnosći wustajiś. Spěchowanje serbskego luda jo za mnjo wutšobna nastupnosć a wjaselim se na dalšne zgromadne źěło.“- Sven Herzberger, krajny rada wokrejs Dubja-Błota.

Na rozgronje, kótarež jo se wótměło w domowniskem muzeju Dešno, stej se mimo jadnarja Domowiny, Marcusa Koinzer, teke pśedsedaŕka Serbskeje rady Heike Apeltowa, wjednik Rěcnego centruma Witaj w Chóśebuzu Bernd Melcher, młoźinski koordinator župy Tobias Unger a cłonk Zwězkowego pśedsedaŕstwa Domowiny a wjednika projekta Zorja Maximilian Hasacki, ako teke pśedsedaŕka Serbskeje rady Kathrin Šwjelina, kótaraž jo teke pó muzeju wjadła a wjednica Dolnoserbskeje šule Ute Henšelowa.