Jan Bart a Ludmila Budarjowa budźetaj dźensa w Sakskej statnej kencliji za jeju angažement na polu rewitalizacije serbskeje rěče počesćenaj.

Bart je projekt Witaj zawjedł a z tym zmóžnjał, zo so serbska rěč tež zwonka maćernorěčneho kruha w kubłanišćach z dwurěčnym kubłanjom dale sposrědkuje. Předsyda Domowiny Dawid Statnik: “Dźakujemy so Janej Bartej za jeho njesebičny angažement za zdźerženje našeje maćeršćiny – za delnjo- a hornjoserbšćinu. A nic jenož to, we wjace hač 60 přednoškach je wón wjace hač 1100 zajimcam lěpšiny a načasnu potrjebu dwurěčneho kubłanja sposrědkował. Ze swojim wosobinskim prócowanjom je wón kubłarkam a kubłarjam, politiskim zamołwitym, kaž tež swójbam a zajimcam Witaj-koncept zbližił”.

Bartej po boku běše tehdyša předsydka Serbskeho šulskeho towarstwa Ludmila Budarjowa. Tež wona budźe za swój angažement na polu serbskeho kubłanja ze Zwjazkowym zasłužbnym rjadom počesćena. “Wjeselu so přez mytowanje Ludmile Budarjoweje. Jeje čestnohamtske skutkowanje w Serbskim šulskim towarstwje mam jako znamjo, zo je towarstwowe hibanje Serbow wažny element, swój přichod wuhotować. Gratuluju woběmaj z cyłeje wutroby”, tak Dawid Statnik.

Jan Bart, Budyšin

Jan Bart je z Witaj-konceptom nowej načasnej metodźe za wožiwjenje serbšćiny po cyłej Łužicy puć rubał. Wón je system dospołneje imersije z bretoniskeho projekta rewitalizacije rěče ,Diwan’ do Serbow přinjesł. W lěće 1998 je so prěnja Witaj-pěstowarnja – „Mato Rizo“ w Žylowje – wutworiła. Hač do dźensnišeho so kubłanski koncept we Łužicy praktikuje. Aktualnje wuknje lětnje něhdźe 250 dźěći w Delnjej Łužicy a něhdźe 1.200 dźěći w Hornjej Łužicy w pěstowarnjach serbsce.

Za jeho čestnohamtske a wuznamne praktiske dźěło k rewitalizaciji a za dalše rozwiće serbskeje rěče w młodej dorosćacej generaciji serbskeho naroda bu Jan Bart 1999 z Mytom Domowiny počesćeny.

Ludmila Budarjowa, Horni Hajnk

Ludmila Budarjowa je so w jeje čestnohamtskim dźěle jako předsydka a sobuzałožerka Serbskeho šulskeho towarstwa za zdźerženje a dalewuwiće serbskeje rěče angažowała. W času jeje skutkowanja so dalše Witaj-pěstowarnje zarjadowachu. Hač do dźensnišeho wuknu w sydom Witaj-pěstowarnjach nošerja Serbskeho šulskeho towarstwa wob lěto na 520 dźěći po principje imersije, tak, zo dźěći rěč po móžnosći kaž maćernu rěč nawuknu. W běhu lět je so Witaj-koncept na šulskej runinje dale wuwił a skića cyłotny kubłanski puć. W Sakskej nawjaza šulski kubłanski koncept 2plus na wukony w pěstowarnjach.