Dnja 17.08.2018 schadźowaše so w Serbskim domje w Budyšinje kulturny wuběrk Domowiny. W srjedźišću dwuhodźinskeho wuradźowanja steješe kulturne herbstwo Serbow. Do rozmołwy přeprošachu sebi čłonojo gremija intendantku Serbskeho ludoweho ansambla Judith Kubicec, wjednicu Serbskeho muzeja Christinu Boguszowu a direktora Serbskeho instituta dr. Hauke Bartelsa.
Tohorunja přitomnej běštaj direktor Załožby za serbski lud Jan Budar a předsyda Domowiny Dawid Statnik. Wobdźělnicy běchu sebi mjez druhim přezjedni, zo je digitalizacija tema, kotryž wšitke serbske institucije w samsnej měrje zaběra. Njewidźi so w tym pak jenož čiste składowanje informacijow ale zdobom móžnosć, wědu wo Serbach a serbskej kulturje lěpje a zaměrnišo zjawnosći prezentować.