Na spočatku posedźenja zwjazkoweho předsydstwa, kotrež přewjedźe so pjatk, 17. měrca 2023 na žurli Serbskeho domu w Budyšinje, předstaji Andreas Ošika, jednaćel Serbskeho šulskeho towarstwa, LUCIJU. Je to nowy medijowy projekt, kotryž so w ramiku strukturneje změny spěchuje. LUCIJA chce kubłać, informować a zabawjeć – to płaći za wšitke generacije.

“Dźakujemy so Serbskemu šulskemu towarstwu za dźensnišu prezentaciju a wjeselimy so na spomóžne zhromadne dźěło. Hižo nětko wužiwamy prawidłownje poskitki, kotrež SŠT nam w ramiku LUCIJE poskićuje. Hač su to posłužby kaž fitnesowe studijo “naša rjana serbšćina” abo tež simultany přełožk: W dobrej zhromadnosći a mjezsobnej podpěrje móžemy našim wužadanjam do serbskeho přichoda lěpje wotpowědować”, praji předsyda Domowiny Dawid Statnik.

Zwjazkowe předsydstwo je dźesać zwólniwych do přihotowanskeho wuběrka “Serbske mustwo – Europeada 2024” powołało. Jemu přisłušeja: Sven Ballack, Frank Ričel, Franciska Hellnerowa, Frank-Norbert Sieg, Handrij Strelow, Feliks Šwjela, Bjarnat Deleńk, Marcus Końcaŕ, Pětr Brězan kaž tež Clemens Škoda. Milan Funka, starosta Serbskeho Sokoła a čłon zwjazkoweho předsydstwa je w tutym zwisku prosył tež Serbski Sokoł zapřijeć. Předsyda Domowiny: “Serbski Sokoł je wažny akter na polu serbskeho sportoweho hibanja. Chce-li so angažować, to jara witamy.”

Zwjazkowemu předsydstwu je wažne, zo po dlěšej přestawce skónčnje zaso Serbowka w Krajnej staršiskej radźe Sakskeje dźěła. Tuž namjetuje, zo so Katrin Suchec-Dźisławkowa jako zastupjerka Serbow w gremiju powołuje a so za to ze staršiskimi rěčnicami šulow ze serbskim poskitkom w Sakskej wothłosuje. Jelizo su dalše namjety ze stron staršiskich rěčnikow to wuraznje wita, wšako je wažne, zo so Serbja w radźe wobkedźbuja a aktiwnje wobdźěla.

Dale wěnowachu so čłonojo gremija přihotam 22. hłowneje zhromadźizny Domowiny, kotraž wotměje so za měsac w Starej chemijowej fabrice w Choćebuzu. Wjace hač 100 delegatow so na njej wobdźěli. Mjez druhim su so jako hosćo hižo prezidentka Bramborskeho krajneho sejma, Ulrike Liedtke, wyši měšćanosta města Chóśebuz, Tobias Schick, kaž tež dalši zapósłancy Zwjazkoweho sejma a Krajneho sejma Bramborskeje přizjewili.

Tež rozprawu zwjazkoweho předsydstwa wo zwoprawdźenju dźěłowych směrnicow w poslednimaj lětomaj su wobdźělnicy wuradźowanja schwalili. Tuta so nětko w zarjedźe za ćišć přihotuje, zo by dypkownje wšitkim delegatam kaž tež zjawnosći předležała.

Naćisk dźěłowych směrnicow Domowiny, kiž płaća za dobu 2023-2025, doporuča čłonojo ZP delegatam 22. hłowneje zhromadźizny Domowiny. Tute su na webstronje Domowiny pod linkom hłowna zhromadźizna za wšitkich přistupne (hlej tež tu). Zwjazkowe předsydstwo prosy wo čiłu diskusiju w předpolu hłowneje zhromadźizny. Namjety ze stron towarstwow a župow njech so zarjadej direktnje sposrědkuja, zo bychu so móhli hišće wobkedźbować, pruwować a zapřijeć. 

Pod wšelčiznami rozprawješe čłonka kubłanskeho wuběrka Domowiny Alena Hiccyna wo zašłym posedźenju gremija. W nim zaběrachu so z aktualnje njespokojacej situaciju zaručenja wučby a serbskich poskitkow na šulach. Wosebje straty corony dla dale skutkuja. Wuběrk namjetuje namołwić lajkow, w kubłanišćach wupomhać. Při tym je wšojedne, hač jedna so wo cyłodnjowski poskitk, pomoc při domjacych nadawkach abo čitanske hodźinki.

Z naležnosću wokoło politiskeho mandata předsydy a dalšich wolenych abo nawjedowacych funkcijow Domowiny, kiž je so w januarje do prawniskeho wuběrka Domowiny delegowała, je so zwjazkowe předsydstwo dźensa zaběrało. We wuslědku wita gremij wuraznje a přeje sej zdobom, zo so w přichodźe Domowinjenjo a Serbja aktiwnje na wšitkich politiskich runinach angažuja. Wosebje na čestnohamtskej runinje njeměł so angažement haćić, skerje podpěrować. Nichtó njeměł swojeje politiskeje nalady dla lěpšiny abo njelěpšiny měć. To wotpowěduje zdobom artiklomaj 2 a 3 Zakładneho zakonja Němskeje.