Štwórtk, 11.8., wopyta skupina 30 młodych ludźi z Ukrainy, Georgiskeje a Němskeje Domowinu. Městno zetkanja je wot někak 10.15 hodź. Serbski dom w Budyšinje. Wobdźělnicy projekta towarstwa „wost” z Drježdźan wěnuja so 8. do 15. žnjenca (awgusta) temje „mjeńšiny a ćěkancy w Europje”, konkretnje statusej a situaciji mjeńšinow a ćěkancow w tutych třoch krajach. K tomu słušeja tež rozmołwy ze zastupjerjemi organizacijow migrantow a mjeńšinow. 

W jutřišej rozmołwje póńdźe wo stawizny serbskeho ludu, dźěławosć třěšneho zwjazka a aktualne towaršnostne a kulturnopolitiske wužadanja. Jako partnerka ze stron Domowiny steji předewšěm Sonja Hrjehorjowa, regionalna rěčnica za teritorij Wojerowskeje župy, k dispoziciji. Na spočatku termina je składnosć za fotografowanje.