Pjatk, dnja 07.03.2025 předstaji so w Połčnicy nowa kampanja w nošerstwje wokrjesa Budyšin. Zhromadnje z Domowinu a Zapadnołužiskim koparskim Zwjazkom (WFV) produkowachu so něhdźe 1400 treningowych košulkow z napismom “Naš sport je wjacerěčny / Unser Sport ist mehrsprachig”. Tute so w přichodnym času wšitkim 70 čłonskim towarstwam WFV rozdźěla.

Dawid Statnik (předsyda Domowiny), Goiko Sinde (jednaćel WFV), Jens Baumann (Sakske ministerstwo za Nutřkowne) a Elaine Jentsch (zapósłanča w Sakskim krajnym sejmje) přepodachu za to dźensa zastupjerjam sportowych towarstwow (Biskopičanski KT08, Budissa Budyšin, Sokoł Ralbicy/Hórki, TSZ Połčnica, ST Marijina Hwězda) prěnje tajke košulki.

Projekt spěchuje so přez Sakske ministerstwo za nutřkowne. Přidatnje je so za akciju wotpowědny lětak zhotowił, w kotrymž wupraji so Dawid Statnik:

"Hdyž w našich serbskich towarst­wach a na sportnišćach serbujemy, spěchujemy widźomnosć a připóznaće našeje kultury. Tak pokazamy, zo sej naš pochad wažimy a jón žiwje wobchowamy. To jenož zhromadnje docpějemy. Na to nawjazujo je předležacy projekt nastał, ko­tryž měri so jako statement na wšitkich zahorje­nych sporta.“