Po lětušich komunalnych wólbach maja so nětko tež dalše gremije wokrjesa Budyšin na wólbnu dobu 2019-2024 znowa wobsadźić, na přikład Dźěłowy kruh za serbske naležnosće. Po Wustawkach za zachowanje, spěchowanje a wuwiće serbskeje rěče we wokrjesu Budyšin § 4 wotrězk 2 skutkuje tutón kruh poboku zamołwiteje za serbske naležnosće. Dźěłowy kruh ma zawěsćić wuměnu informacijow w serbskich naležnosćach a spěchowanje zwoprawdźenja mjenowanych wustawkow (https://www.landkreis-bautzen.de/download/kreisrecht/SorbSa.pdf).Dźěłowemu kruhej přisłuša po wustawkach mjez druhim pjeć wěcywustojnych wobydlerjow, kotrychž Domowina w dorozumjenju ze serbskimi zwjazkami na dobu jedneje wólbneje doby pomjenuje. Wuměnjenja su znajomosćemi serbskeje rěče, kultury a namrěwstwa/tradicijow (Überlieferung). Namjet ma wobsahować mjeno, předmjeno, adresu, telefoniski a mejlowy kontakt kandidata. Předsyda Domowiny Dawid Statnik je so nětko z listom na serbske towarstwa a zwjazki wobroćił z próstwu, hač do 19. awgusta 2019 zarjadej Domowiny w Budyšinje kandidatow mjenować, kiž móhli jako wěcywustojni wobydlerjo w Dźěłowym kruhu za serbske naležnosće wokrjesa Budyšin sobu dźěłać. Namjety njech so prošu pósćelu na slědowacu adresu: Domowina z. t., Póstowe naměsto 2, 02625 Budyšin, e-mail: sekretariat@domowina.de.Zwjazkowe předsydstwo Domowiny ma na swojim posedźenju dnja 06.09.2019 w Budyšinje rozsudźić a pjeć wosobow do tuteje čestnohamtskeje funkcije powołać.Na dalše prašenja k tomu wotmołwja Werner Sroka, referent Domowiny za nutřkowne naležnosće (tel. 03571 418026, e-mail: werner.sroka@domowina.de)