Sobotu, 28. apryla, w 14 hodź. wotměje so na městnje něhdyšeje „krawneje chójny“ při lěsnym puću wot Łomska na směr Šešow ekumeniska, němsko-serbsko-pólska nutrnosć. Na njej wotkryje so wopomnjenski kamjeń za pólskeho dźěłaćerja Stanisława Błażejczuka. Wón narodźi so 27. julija 1915 we wuchodopólskim Witoldówje a bu na wopomnjenskim městnje 25. apryla 1942 wotprawjeny. K tutej składnosći je wušła serbsko-němsko-pólska kniha „Row w serbskej holi – Das Grab in der Heide – Grób w łużyckiej kniei“ ze znatym powědančkom Marje Kubašec a z wuslědkami slědźenjow Trudle Malinkoweje wo tutym zrudnym podawku, wo pólskim NS-woporje a wo powědančku. W domizniskim muzeju w Njeswačidle tematizuje so we wosebitej wustajeńcy wo času 1933 do 1945 tež wopomnjeće na Stanisława Błażejczuka. Kniha budźe tam na předań. Na nutrnosć přeprošuja wutrobnje Njeswačanska wosada, zarjadnistwo gmejny Njeswačidła a Towarstwo přećelow kultury a domizny Njeswačidło z. t.