We wobłuku wustajeńcy „Što rěka tu mjeńšina?“ Mjeńšinoweho sekretariata přeprošuje Serbski muzej Budyšin na přednošk dr. Cordule Ratajczakoweje, nawodnicy rěčespyta projekta ZARI:

„Wot bolostneho woněmjenja k ćežkemu wróćenju serbšćiny. Dohlad do rěčnych biografijow z ewangelskeje Hornjeje Łužicy“,srjedu, 16.04.2025 w 19:00 hodźw Serbskim muzeju.

Dr. Cordula Ratajczakowa je so we wobłuku swojeho slědźenja z 30 wosobami ze serbskeje Hornjeje Łužicy rozmołwjała, kotřiž serbšćinu w swójbje nawuknyli njejsu. Wo tutych rozmołwach je wona hromadźe z koleginu prof. dr. Nicole Dołowy-Rybińskej reflektowała, po wosebitym mustrje koděrowała a wuslědki nětko prěni raz zjawnosći předstaji.  

Wona wobswětla wosobinske nazhonjenja a wužadanja, kotrež běchu zwjazane z womjelknjenjom serbskeje rěče w swójbje. Tež puć k wozrodźenju a nawrótej serbšćiny slědźerka tematizuje.

Zarjadowanje skića składnosć, wjace wo generacijach w Hornjej Łužicy bydlacych zhonić. Hańba, strachi abo zranjenja wobwliwowachu poćah k serbšćinje. 

Hižo w 18:00 hodź. su zajimowani wutrobnje na wodźenje z kuratorom dr. Robertom Lorencom přeprošeni.

Wustajeńca je zhromadny projekt Mjeńšinoweje rady štyrjoch awtochtonych narodnych mjeńšin a ludowych skupin Němskeje kaž tež Zwjazkoweje rady för Nedderdütsch a bu jako pućowanska wustajeńca koncipowana. Mjeńšinowy sekretariat, kotryž je w nošerstwje Domowiny – Zwjazk Łužiskich Serbow, koordinuje wustajeńcu. Projekt so přez Zwjazkowe ministerstwo nutřkowneho a domiznu spěchuje.